【戒尿片真係要講時機媽媽們不要心急】

By 禧。熙。之生活點滴 on 04 Aug 2019

我叫Mandy, 是一位80後全職媽媽和blogger, 育有兩位寶貝(禧禧同熙熙)。感恩能夠成為全職媽媽，可以見證及陪伴小朋友成長並透過日誌記錄禧&熙既生活點滴。喜歡鑽研烹飪，為小朋友煮岀有營食物，享受湊b生活並喜歡吃喝玩樂，行街及扮靚。

一般黎講，喺小朋友1歲半至2歲期間，如果觀察到佢有一啲特定的跡象，就可以開始訓練佢戒尿片，通常3歲前就可以成功戒到。當然，每個小朋友既進度都不同，不能一概而論。禧家姐喺2歲11個月成功戒到尿片, 但我想分享下佢既驚嚇戒尿片過程！

戒尿片好時機係當你小朋友有明顯徵兆用廁所，例如：

-有便意時想除去尿片

-尿片污糟會發脾氣或感覺不自然

-直接表達你知佢想用廁所

而我就係一個錯誤既示範！我無細心觀察戒尿片既徵兆，有少少心急想幫小朋友戒尿片，以致有反效果。

話說喺禧家姐大概2歲既時候，有一日佢無端端扯住條褲同我講要去wee wee, 我極速跑去洗手間攞佢個私伙細座廁俾佢，跟手幫佢除褲，除尿片坐上座廁，佢竟然肯去，仲要去埋poo poo。但可能係第一次用座廁，佢覺得好好奇，全程彎低身睇住自己去廁所既過程，突然間佢發現有poo poo 喺自己個pat pat 走岀黎，即刻嚇到大喊仲彈起身周屋走，但當時佢pat pat 仲癡住左舊poo poo 未去完，我好不容易先可以令佢冷靜返，但佢個表情話俾我知佢好驚，嗰一刻我已經心知不妙佢既戒尿路應該要泡湯，佢應該係未準備好要戒尿片。結果，真係俾我估中，由嗰次之後禧家姐唔肯再用個細座廁，繼續用返尿片。

兩個月之後，我再嘗試鼓勵禧家姐用細座廁，今次我買左另一個新既俾佢，因為我怕佢對之前嗰個座廁有陰影，點知都係失敗，佢完全唔想坐落去，感覺仲係好抗拒。之後我都冇再嘗試俾佢用座廁，決定佛系戒尿片。

最終係兩星期前，家姐突然間同我講要用大人廁所，唔要去落尿片度，我又即管俾佢試下，今次佢都係wee wee poo poo 一齊去，好順利，過程絕無抗拒感，去完仲話要沖廁同洗手，由於佢喜歡用大人廁所，所以又買多個小童廁板俾佢，自嗰次之後就開始真正戒左早上尿片，至於夜晚尿片相信仍需要包片幾個月。一般早上訓醒發現尿片依然係乾的話，就可以開始戒夜晚尿片了。