【最怕小朋友大庭廣眾扭計 新手媽媽忌失控】

生咗小朋友之後，生活有所改變就一定㗎啦 。出街要帶好多嘢係其次， 餵人奶亦都唔係最麻煩 ，反而最怕小朋友扭計。比卡超人妻響呢一兩年 ，遇到不少比人啤既經驗。

唔肯食飯或者掉嘢食落地已見怪不怪，有幾次真係低處未算低 ，唔肯食飯再加上扭計 ，最怕係佢響餐廳度尖叫。跟住坐隔離枱啲人個個bear實我哋

想避免呢啲尷尬情況 有幾個貼士：

-等小朋友瞓醒晏覺至出街食嘢

-避免去一啲太窄太細嘅地方食飯。 因為如果自己同隊友要抱住小朋友出去行過轉都方便啲。太窄太細嘅餐廳 。。成日行出行入，點都會阻到其他食客同待應。

-手袋成日有幾支顏色筆同白紙又或者先喺屋企print定一啲畀小朋友油顏色嘅公仔畫紙。

-帶定一兩件平時喺屋企，或者喺車好少玩嘅玩具，咁小朋友就會有新鮮感，肯坐定定喺餐廳度。

如果小朋友真係大吵大鬧緊記同自己講要冷靜 ，千祈唔好向公眾場所失控破口大罵。比卡超人妻亦都試過好多次自己情緒管理得唔好，有啲失控，但係其實對當時嘅情況一啲都冇幫助。經過幾次教訓之後發現最好抱小朋友離開餐廳一陣。

其實好多時小朋友響公眾場所大吵大鬧 ，扭計唔聽話，家長會覺得係佢哋吾啱，但係好多時可能係我哋嘅錯。 例如時間管理得唔好 ，小朋友已經太過疲累， 好想休息，但係好多時通常都係。。。大人傾計傾得耐咗，小朋友覺得好悶，冇心機繼續坐落去

嘗試享小孩嘅角度去安排時間表同進餐時間，咁樣就可以避免細路仔響出面大吵大鬧嘅情況。有好幾次自己都睇住時間 快脆食完，拿拿臨擺低啲錢，同朋友講要走先。

有咗小朋友，自己時間管理方面真係進步咗， 日日都分秒必爭，睇住時間要幾點返到屋企等佢瞓晏覺。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：比卡超人妻

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！