【仔仔不願自己上班 矛盾感湧上心】

因為自己要母兼父職，所以根本唔洗諗咩做全職媽媽定咩咩媽媽，但每位小朋友都一樣，想黐實媽媽，結果真係每朝返工都要上演難捨難離嘅戲碼～

其實仔仔大個咗之後都好清楚「媽媽係要返工」嘅道理，但有一次佢好似唔舒服，作病，扭計情況嚴重咗，喊極都唔失聲，仲話「蛋蛋要媽媽，媽媽唔好走」就係個句「要媽媽」真係中晒我嘅心，母愛真係爆發出嚟，點解佢要我，我都離開咁殘忍！最後，薯蛋婆婆就抱走佢，叫我快啲走，最後我就忍住拎袋走人。

其實BB咁樣會搞到好麻煩，絕對係愛自己嘅表現，我覺得當時自己都做錯，應該唔好即刻走！有時自己都會好難過，覺得要佢承受媽媽唔見咗大半日，會怕佢覺得「係唔係媽媽唔要佢？」一諗到依度自己都好唔開心，責怪自己「媽媽畀你嘅愛係唔係唔夠多？」、「但要面對現實，唔出去做嘢點生活，更何況我係單親媽媽⋯⋯」如是者，工作個陣，都會成日受到良心掙扎，不停責備自己點解要拋低仔仔⋯⋯

可能會有人覺得係我諗多咗：「當我走咗之後，小朋友不知玩得幾開心，生活一樣，瞓晏覺、玩玩具，根本冇問過媽媽去咗邊，就算有，畀幾塊餅餅後又唔記得咗⋯」但做媽媽嘅都會覺得欠咗佢咁，我都知咁樣做好唔成熟，因為咁樣反而會影響到工作，最後兩頭唔對岸。

為咗咁，我都會時刻提自己，工作就工作，休息時，可以打比佢，關心佢，出門後時就主動同耐心同佢講媽媽係去工作，一定會返返佢身邊⋯⋯佢都開始明白⋯⋯

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：薯蛋媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！