【父母每日都處於被挑機狀態】

By 禧。熙。之生活點滴 on 22 Jul 2019

我叫Mandy, 是一位80後全職媽媽和blogger, 育有兩位寶貝(禧禧同熙熙)。感恩能夠成為全職媽媽，可以見證及陪伴小朋友成長並透過日誌記錄禧&熙既生活點滴。喜歡鑽研烹飪，為小朋友煮岀有營食物，享受湊b生活並喜歡吃喝玩樂，行街及扮靚。

家姐成日會扮聽唔到我同佢講野，唔聽指令，叫佢行左佢行右，鍾意自己完成某啲事，固執，坐唔定，最鍾意同其他小朋友嘈交。大部份時間都係處於挑機狀態:-<

-買左個新廁所板俾佢，佢覺得好靚好新奇，上左床準備訓覺，不停話要去wee wee poo poo, 半個鐘裡面落床去左四次廁所，但每次得兩滴，實情只係想去坐個新廁所板，探新鮮，真係佛都有火

-弟弟訓晏覺，叫佢細聲啲講野，佢就大叫，越講越大聲，每次都嚇醒弟弟。正處於幼兒時期既弟弟正正需要充足既睡眠去發展整體健康、認知能力和情緒

-鍾意自己著衫褲鞋襪，拒絕父母幫忙，想教導正確穿著方法，但佢會對住你講「No,我自己著」，然後著錯左又大叫。相反，著得啱既時候佢又會好沾沾自喜，例如著有紐扣既外套，扣啱既話會好得戚咁叫你睇下你睇下,不停講，真係俾佢激到來回地獄又折返人間

-當見到佢做危險動作既時候，會用強硬語氣去嘗試阻止，但佢會跟我講野，我講一句，佢又講一句，仲要加多幾分自創表情，模仿我好嬲好唔滿意既神態

-岀街見到水氹一定大腳踩，即使講過無數次啲水好污糟，但依然我有我講，佢有佢踩

-劃圖畫既時候唔知點解佢一定要好大力咁將啲蠟筆鋤落張畫紙度，好似同啲筆有仇咁，最終全部蠟筆斷曬。叫佢溫柔啲，佢會做，但唔係次次都聽

-每日都提起表弟話要同佢玩，但每次見到表弟都會因為爭玩具而令到對方喊，又或者攪到兩敗俱傷

-每次擦牙都好唔正經，擦完牙就會攞個牙擦擦牆，地下，櫃，梳化，激到嘔血

我大概知道Trouble 2 / Terrible 3 呢個階段既小朋友係會好喜歡故意挑釁或鬧情緒，其實佢哋想試探下父母既底線，想和父母溝通同表達自己既意願，奈何佢地表達能力仲未成熟，所以好多時令到父母激心同失望。好耐之前睇過一篇文章，隱約記得文章提及過當面對小朋友無理取鬧或者挑戰父母底線時，應該先自己保持冷靜，細心聆聽和明白佢哋既想法，等佢哋泠靜左之後先再講道理。