陀B必睇！5大方法舒緩孕期抽筋

相信好多媽媽喺懷孕時都經歷過抽筋現象，特別係懷孕中、後期。不論係瞓緊覺、行路或者坐低，都會突然抽筋，痛到動彈不得。今次分享幾個舒緩孕期抽筋嘅方法，大家不妨參考一下。

Photo from MamiDaily

點解會抽筋？

Photo from MamiDaily

1. 媽媽喺懷孕期間，體重增加，加重咗小腿肌肉嘅負擔。平日如果需要經常站立或行路，更加容易令小腿肌肉疲勞、疼痛，導致收縮抽筋。

2. 胎兒需要吸收大量鈣質，供給骨骼及牙齒生長。若果媽媽唔夠鈣質，好易會令神經傳導失常，引起抽筋。

3. 懷孕時，子宮脹大，加上胎兒嘅重量，令下肢神經及血管受壓迫，造成血液循環不良。

舒緩/預防方法：

Photo from MamiDaily

1. 腳抽筋時，若站立，可將腳跟掂地；若平躺，可用腳跟貼住牆壁，伸直腿部，避免屈曲膝蓋；將腳掌向膝蓋嘅方向，往上彎曲。

2. 伸直雙腿，喺出現疼痛嘅肌肉位置，以打圈方式揉按，放鬆肌肉。

3. 懷孕期間，盡量避免長時間站立或走動，每30分鐘左右，就要休息大約10分鐘。另外，穿著舒適嘅鞋子亦非常重要。

4. 每日用暖水浸泡小腿15分鐘，並按摩腿部，放鬆肌肉，促進雙腳血液循環。

5. 進行適量運動，如散步、瑜伽、游泳等，幫助睡眠之餘，亦能減輕懷孕期間的不適。

Text：Mami Editorial