【究竟一孕會傻幾多年？產後失魂實錄！】

忘記是極殘忍，無奈我生完個女之後，真係成日唔記得野，以前聽人講一孕傻三年，我都會諗有無咁誇張呀？係咪生完之後忙住湊BB，將集中力放晒喺佢身上，所以先變到咁冇記性咋？少婦你太年輕了！原來事情並唔係咁簡單，當然生完唔會突然之間無咗個腦咁嚴重，但真係會變到好無記性，唔通生嘅時候吸太多笑氣都有影響？

以下就係我失魂備忘錄，我仲記得發生過呢幾件事，證明我仲有得救嘅，所以媽媽今天不必擔心我☺️

事件一

BB出院後因為黃膽指數責界，所以要連續兩日返醫院抽血，第二日朝早老公如常陪我同BB返醫院，去到登記嘅時候，我先發現自己唔單止冇帶身分證，我係成個手袋都唔記得帶出門，好彩我仲記得帶個女出門。不過最吊詭嘅係，點解我老公冇提我帶手袋？唔通佢都有份喺産房生個女？

事件二

話說要幫BB搞出世紙，由於我坐緊月，所以交低個身分證俾老公自己去搞，然後過咗半個月後，我同陪月帶埋囡囡返健康院度高磅重，check生長指數，點知囡囡滿月後黃膽指數都仲係有少少高，所以要即刻返醫院再抽血，健康院姑娘提我要出示醫生信同埋媽咪身分證，仲有BB嘅出世紙，然後我先驚覺我張身分證唔見咗，仲好慌張咁打俾老公，跟住唔知過咗幾耐，我先發現我張身分證俾咗老公已經接近大半個月，一直都冇拎番，再次吊詭嘅係，點解老公都係唔記得畀番張身分證我？

事件三

我放完產假後復工，無耐就決定辭職全力湊女，由於我係從事傳媒行業，公司規定last day嗰日要去大堂交番低張員工證同飯卡，當日我離開公司後，返到屋企先發現自己兩張卡都冇還俾公司，即係當日我係逃犯，逃之夭夭，好彩約咗同事當晚食宵夜farewell，我再交低比佢哋，最令我驚訝嘅係，我連離職信都唔記得拎，咁其實我last day返到公司做過啲咩？應該係請人食散水餅同影相，唔該晒。

其實仲有好多瑣瑣碎碎嘅事，嗰啲我就真係唔記得咗究竟自己唔記得咗啲咩啦，大家明唔明我講咩？同埋以上故事話畀我聽，媽咪生完會傻咗，爸爸都一樣會傻咗！

想知道更多有關波豬媽媽嘅日常，請like & follow

奇異之日常

https://www.facebook.com/kiwi180122/

Ig: kiwi0419

Ig: ballchu_chan

個人簡介:

波豬媽曾任電視台主播，亦從事過文字工作，如今係一位新手媽媽、緊張大師。人生座右銘係無論女人處於任何階段，都要活得精緻兼有層次。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：波豬媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！