【二胎媽媽生產經歷大不同】

自從有左第二胎，就周圍參考其他二胎媽媽生產經驗同第一胎有咩分別~

同第一胎比較，陣痛至到生要幾耐？有人又話會痛好多，有人話會快好多等等等等....

終於，輪到我可以分享！！冬甩妹妹5月8日出世啦！

兩兄妹都係東區醫院出世，先要讚一讚，雖然政府醫院，無輪係普通病房或者產房入面所有姑娘都好friendly，充滿愛！

相隔差不多三年，兩次生產感受都無變，一樣咁好！就算生完，餵母乳一樣好多支持，一日黎關心你好多次

睇你餵成點，有無咩問題咁，真係住院幾日爽過出院番屋企.....哈哈！

回歸正題，分享下兩兄妹生產過程啦～！

哥哥：

10月15日：預產期入院催生，宮頸未軟，塞藥

10月16日：夜晚自動波陣痛唔使催生，11PM堅痛穿埋水，入產房，一路痛....

10月17日：等到7:30AM先話開夠度數，搞到9:07AM先出世，仲要吸出黎！
總結：都痛左10個鐘左右先生到！

妹妹：

5月7日：日等夜等...又到預產期前一朝，見紅，無乜痛。因為唔肯定係咪高位穿水，所以照入院，一路唔痛到夜晚仲係無乜FEEL，而且仲要隔勁耐先陰陰痛

5月8日：零晨仲係病房走廊散步、玩FITBALL，務求加快生產過程(第一胎都已經狂玩)，到3AM，姑娘仲關心我唔訓覺休息下周圍行，之後上床後開始有痛，一路用APPS睇住陣痛,但一時10分鐘一時5分鐘（一路記住姑娘話到5分鐘痛一次就叫佢地檢查下），因為唔規律，所以痛都無叫姑娘，直至大約5AM，突然FEEL到有想疴既感覺，諗住痛完呢轉落床去護士站同姑娘講（因為以為隔好耐先再痛，大把時間RECOVER...真係太天真！），想落床一下一波又黎，勁想疴耶！即刻FEEL到唔對路，按鐘姑娘黎CHECK，竟然已經開到8度！！姑娘都進入緊急狀態，拿拿聲執野、過床即入產房（上次坐輪椅），入到產房，12分鐘就咇左妹妹出黎！實在太AMAZING！

總結：第二胎真係快好過第一胎，起碼快一倍！特別係度數會開得快好多，所以各位二胎媽媽唔好懶懶閒，以為有一次經驗就慢慢黎！係醫院等生最穩陣！（不過當然都要睇下兩胎相隔幾多年）

關於兩兄妹成長、加固歷程，快D黎睇下佢地既FB PAGE: https://www.facebook.com/ISSACnDONUT/

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：ID MA

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！