【以為輕鬆脫難卻步入斷捨難離人奶之路】

By Wing媽媽 on 18 Jul 2019

我是一個新手媽媽，當然心中有著很多的問號，偏偏我就是一個喜歡尋求原因的人，不同的用品對不同小朋友的效果，教育下一代，甚至我女兒的每一個第一次，做一個好媽媽係每一個媽媽的心願，我希望可以利用一個平台記住我和小朋友一起成長的經歷和經過，留下一個美好的回憶。

由選擇餵人奶既一刻開始，你就要明白呢條艱辛嘅路唔易行。生之前我一直講：「我唔會比佢埋身食人奶架！費事佢第時咁痴身！」起初生完，即刻就開始飲陪月比我帶入醫院嘅炒米茶包，到生完第二日開始，醫院既姑娘就教點樣埋身，因為話埋身可以快啲上奶，所以我就試下！第一日，我好記得當我第一下抱起阿女，放埋身，佢已經識口擘擘搵乳頭食奶，佢開始吸啜既第一下，我直情：「嘩嘩嘩！」叫咗出黎，因為感覺麻麻！到第二日，開始見到阿女吸啜到白白黃黃嘅奶係口，老實講，呢一刻真係好興奮。

係坐月期間，我一路都祛唔到水腫，令到人奶既量好少，加上我都想堅持唔埋身，所以奶量更少，好記得當時一日要泵六至七次奶，加埋阿女未戒夜奶，真係好辛苦，每日都唔夠瞓，加上唔夠奶，打破咗我一直可以全人奶嘅信念，比左好大壓力自己！老公又係呢個時候勸我：「不如唔好泵奶啦！咁辛苦！食奶粉都好好營養！」但係媽媽心目中，人奶同奶粉點會無分別呢？

Photo from mamiDaily

後來到阿女個半月，終於我搵咗催乳師幫手：「不如再試下埋身啦！」當阿女再試埋身之後，的確佢比左一種好唔同嘅感覺我，當我地一齊瞓係床，佢覺得肚餓嘅時候佢會用其中一隻腳仔夾住我條腰，細細短短既腳仔用力夾住你，兩隻手仔好似好祈求咁放係我心口前面食奶，呢個畫面令我澈澈底底打破左我想放棄餵人奶嘅諗法，佢比我嘅感覺係佢好需要我呀，媽媽一定要堅持餵人奶！由個一刻開始，我決定無論幾辛苦，我都要繼續餵落去！放產假嘅每一日，我都陶醉係埋身餵人奶呢個時刻。雖然而家泵一日四五六次，只足夠佢食一至兩餐一日，但我都覺得我要繼續做落去。當人人都同我講：「不如算啦，餵奶粉啦！」我會講：「我唔係要比佢飽肚，我係想比佢食抗體！」無論中西醫都好鼓勵我嘅諗法！

Photo from mamiDaily

但到個女三個月，我又開始返工，亦到左要決擇嘅時候，有時見阿女死都唔肯比我用奶樽餵，死都要喊到我比佢埋身，我又開始怕佢再大啲，會依賴咗我而好難再戒埋身，我又驚我返工工時長，無得埋身佢會唔慣，所以我又決定要同佢忍痛戒埋身，有時見佢係咁喊，的確好肉赤，我諗呢個感覺，每個戒埋身嘅媽媽都試過，就好似戒毒一樣，我只係埋身兩個月都有咁強烈嘅感覺，何況餵更長時間嘅媽媽呢？不過可能佢真係仲細，好快就戒甩咗，到我再想嘗試比佢埋身，佢已經唔肯！媽媽我呢刻又覺得好似：「個女唔要我啦！」老公前兩日問我：「係咪完全戒曬埋身啦？」我既答案係：「係呀！而家好似分手咁呀！」老公笑：「分手咁？」我答：「係呀！個陣同你鬧交鬧到話分手都無咁唔開心呀！」雖然戒咗埋身，但我都會努力泵奶，盡力比到幾多就比幾多你！