【講返聲 BB同狗狗相處係冇問題的】

我家有1B2毛。兩毛叫叮叮同噹噹，其中叮叮仲係睇住我地結婚生仔。阿姐出世後，兩隻毛孩好乖，唔識照顧BB，但會做陪奶員。

噹噹仲成日痴住阿姐，兩個會一齊瞓、攬頭攬頸、互相掛住大家，阿姐出左去玩，噹噹坐係門口等呆等...

或者阿姐出左街會同我講掛住叮叮噹噹想返屋企，恩愛程序令人側目。

阿姐BB時已經同阿噹痴住。

當然，懷孕中途都會有啲唔關事既人問:

【甘兩隻狗點處理呀？】(留意返係「處理」)

【你唔將佢地送走呀？】

【好多菌架喎，對小朋友唔好呀】

其實點會問人呢啲問題呢？你會唔會隨意送走家人呢？陪你好耐既一個公仔都唔捨得唔要，何況係生命? 有感情的喎。

當我隻眼反到270度時，感謝人地老豆幫我輕輕打發呢啲人【佢唔要我，都唔會唔要啲狗架】。

噹噹呆等阿姐回家個樣好似生意失敗

早前阿唔知邊個邊個既老婆，係節目講左番「絕對送走」呢4個中文字。

人，老母唔批評喇!

不過短短3年幾經驗黎講，我可以同所有人講，我姐同叮叮噹噹一直相處好好。

落完街會洗腳、勤換尿墊、佢地大解小解完會抹pat、執完便我地會洗手先抱女/餵食、又會教女玩完毛孩要洗手，保持衛生，咁仲有咩問題?

當然，要送走貓狗既人總會有十萬個自以為合理化既理由。但講到衛生原因.....你會執屎比BB 玩嗎？ 唔日日吸毛? 唔開空氣清新機咩?

外界好多文章關於醫學界研究小朋友同貓狗一齊生活既好處，唔信既可以自己爬文。

而有貓狗陪伴成長既小孩，唔多唔少會由父母身上學出一份責任感;

誇張啲講，一早接觸到毛質、肉掌、小尾巴，觸感發展仲贏在超跑線添~~~~(個人主觀立場意見不代表Mamidaily)

因為生小朋友而棄養貓狗，身為父母點對得住良心同小朋友講你曾經做過乜野? 定係選擇隱瞞?

第時細路睇相問【爸爸，呢隻狗狗你架? 去左邊呀？】你點答呢？

或者養毛孩前應諗清楚，係咪加多個家庭成員就承擔唔到養毛責任。

唔好好似某名人自稱自己鼻敏感所以送走隻貓，從此一家五口快活過神仙，但此神仙生活不包括隻貓......

如果係既，你地真係唔好養。養得既，就負責到離世一刻。

支持領養，不棄養不買賣。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：老母是這樣練成的

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！