【給老公的說話】

By Wing媽媽 on 12 Jul 2019

我是一個新手媽媽，當然心中有著很多的問號，偏偏我就是一個喜歡尋求原因的人，不同的用品對不同小朋友的效果，教育下一代，甚至我女兒的每一個第一次，做一個好媽媽係每一個媽媽的心願，我希望可以利用一個平台記住我和小朋友一起成長的經歷和經過，留下一個美好的回憶。

當生完之後，唔知點解不知不覺產生左一種好憎恨老公既感覺，雖然佢已經好努力做，就算佢願意半夜餵夜奶，佢願意對囡囡講故事，但你仍然覺得佢係豬隊友。

給老公的說話

由我陣痛既一刻起我就諗：「一個女人願意為一個男人生bb既話，呢個女人一定好愛你！」由承受呢種痛之後，我發現自己真係好愛你，不過呢個時候更出現左你做咩都做唔好既你。的確，以前既老公都唔係完美可以事事做好，但可能我覺得影響好細，所以好多時都不以為意，但係到生左小朋友之後，呢個bb就成為左我既命根，因為我用左我既生命去搏而換佢既生命返黎。佢成為左我既一切，作為媽媽，我要保護佢，樣樣做到盡善盡美，係呢個時候，平時已經唔係完美既你，就成為左罪人。我想你幫手，當你答我：「我隻手污濁呀！」我心入面諗既係：「咁點解你唔係答我：「我即刻去洗手！」然後過黎幫手呢？當我講過屋企開門閂門要細聲啲，每次個女剛瞓著，你既閂門聲嘈醒佢，你會答：「唔好意思呀！」我心入面係諗：「點解你永遠當我耳邊風呢？每次講唔好意思而唔係好好記住！」當我比人話我唔識湊女，點解你一句聲都唔會幫我講呢？可能以前你都係一樣嘈醒我，一樣唔會即刻幫手，我比人話你唔會即刻幫口，但當套用落個女到，我就會將件事x100倍，豬隊友就係咁樣形成，你之前點對我好點做得好既野都會一下打沉。

試諗下，我唔愛你，又點會嫁你，又點會為你承受10級痛去生女呢？我希望你明白生之前既女人的確係無咁計較，而生完既女人係咩都計較架，因為愛你，我會想你多啲係我身邊，作為一個新手媽媽，我樣樣都好怕，我好想有你同我一齊分擔，有你陪我，有你係身邊安慰我同我講：「唔洗驚，我就係你隔離！」我並唔係生果陣先驚架，所以請你諒解我咩都緊張咩都驚，因為只要寶貝女有一丁點既問題我都會好驚好緊張，所以我的老公，我是愛你的！我知道我脾氣真係好大，希望你可以忍一忍我既脾氣，我們一齊再努力一點做好爸爸媽媽既角色！