世紀煩惱 生唔生多個好？

近年社會動盪，令好多夫妻對生小朋友有啲卻步。而對啲一孩家庭嚟講，生多個BB不但會加重經濟負擔，父母仲要用多啲精力、時間照顧小朋友，「生多個，咪搞啦！」不過，其實好多都認同有多咗個玩伴係會令仔女成長嘅過程充滿樂趣，對佢哋未來嘅發展更有幫助。

Photo from MamiDaily

1. 提升社交能力
小朋友一齊生活嘅時候，兩個人自自然然就會學識點樣同對方相處。加上仔女一齊玩樂容易會有磨擦，大個識朋友時都識得點面對唔同情況啦～

2. 互相陪伴
一個人，怕佢悶；兩個可以互相陪伴。玩嘅時候一齊玩，食嘢又一齊食，兩個人一齊成長，絕對唔會孤單！

Photo from MamiDaily

3. 升學有優勢
依家報讀學校好多都要計分數，有時兄弟姊妹都有分加。如果大嘅入到心儀學校，細嘅要入讀同一間，機會都大啲啦！

4. 懂得分享
玩具、衣服、食物可以一齊用，學識分享比起任何事情都更重要！小朋友變得大方得體，咩都唔介意同其他人分享，被排斥嘅機會都細啲，爸爸媽媽都放心啲啦！

Photo from MamiDaily

5. 多個人傾心事
小朋友大大吓，唔知點解對住大人真係好難開口。如果有兄弟姊妹嘅話，就多一個渠道傾訴。唔會積積埋埋喺個心度，心理健康好啲，患情緒病嘅機會都細啲啦。

6. 共同面對困難
當有日父母離開嘅時候，兩個小朋友都可以互相扶持，有咩困難都有對方幫助，唔需要單獨面對。難過嘅時候，有家人嘅支持真係好重要！

Photo from MamiDaily

Text：Mami Editorial