【全職媽生活日記】

Full Time Mom對於未有小朋友嘅人黎講，第一反應就係‘‘妳就正啦，唔洗做有人養，做少奶奶啦‘‘

我相信所有獨力喺屋企湊b嘅ftm都無法認同。。

如果24小時on call，唔舒服都仲要停手咁做係叫正，咁ftm的確係好正。

FTM係一份需要極大體力，耐性同精神嘅工作，

除左大部分時間用黎照顧呀b，仲有家務要兼顧。

隨著呀b滿月，陪月姨姨都約滿，

爸媽開始投入靠自己執生嘅時段，

一日之計在於晨，

凌晨4點幾呀b喊要飲夜奶，

起身煮落五更飯，餵完就可以食。

好彩有老公做夜更隊友，

佢煮落飯，餵完b先叫我起身食，

5點幾邊泵奶邊食飯，

之後煲炒米茶，洗野消毒奶樽兼泵機parts，

開機洗衫，執屋等等瑣碎雜務。

8點左右老公起身返工，

我就差不多可以再攤返落床... 兩秒!

因為已經4粒鐘，寶貝又係時候要喊要換片飲奶，

搞掂左bb又要處理返洗好嘅衫，

煲好嘅炒米茶，消毒好嘅奶樽。。

可能你會話唔食五更飯同炒米茶咪輕鬆啲囉，

但唔食飯，唔飲茶，身體就會唔夠奶俾呀b飲，

我唔食可以當減肥，但呀b呢?

所以再忙都係要飲同食。。

好啦，完成一堆事之後大約11點幾，

好彩嘅就可以自己整飯餸食，

但通常都係無得食。。

不斷有人喊同要換片，唔俾放底，

唔食都好，可以一齊攤下床，

攤一陣又係時候趁有太陽，擺陣幫寶貝沖涼，

沖完就到洗b衫，執返好個陣。

話咁快又有人肚仔餓要飲奶，

飲完掃好風應該就可以瞓覺好嘅，

麻咪終於可以煮啲野食下，

已經係3點幾，餓到最盡嘅一刻。

食飽就要泵奶，可以碌下電話，

做下公司野(記住麻咪只係偽ftm)，

碌下媽媽谷，睇下其他媽b發生咩事，點樣預防處理，

安排下打針，網購下呀b啲必需品。

大約6點如果老公唔洗見客就收工返到黎，

簡直係救星，有人睇住呀b，

咁我就可以煮飯，

9點通常食到一半有人聞到飯香，又要喊食奶，

老公喺度就通常靠佢頂住，

麻咪經歷左一日不斷loop喊聲換片餵奶掃風扭抱，

其實精神已經好崩潰好攰，

有時食飽飯直接瞓著，

12點再餵奶，

自己沖完涼可以碌上床都差不多1點，

然後又再loop返去晨光第一線凌晨4點。。。

有啲日子仲要加插媽媽手，產後腰痛，

痛到抱唔到b，行唔到路，都要繼續抱同做野。。

FTM真係唔係嘆世界，唔係玩下b就一日。。

說什麼坐月產後好好休息，唔好妄想。。

坐月期間除左湊b，

仲會有極多意想不到嘅難題同困擾，

就算坐小月時有陪月都攰到傻。。

但話返轉頭，

可以24小時睇住bb不斷成長，

呢件事係無價，

Bb健康，食飽，同你笑，同你講野，再辛苦再崩潰，

麻咪第2日一樣會心甘情願繼續照顧好隻臭豬妹。

母愛有幾偉大，媽媽有幾好，

真係要自己做左媽媽先知道得透徹!

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Stefani

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！