【親子旅行】飛媽媽高雄親子遊｜超好玩民宿

終於嚟到旅行最終回：龍貓民宿呀！！！

當初為咗要住龍貓房，我地改咗旅行日期，成個trip比原定計劃遲咗2日去玩，就因為得返呢兩晚有房，所以改日期都要住呢間呀！

呢日我地去完哈碼星小火車玩就call uber返民宿比米豬訓晏覺，佢係暈住咁落車嘅～

穿過呢隻門就好似入咗魔法隧道咁喇～

開門嗰陣我用盡身體每一個細胞嚟阻止自己尖叫出嚟呀～！

係龍貓呀！仲有次子喺度等我地呀～仲有得盪韆鞦呀～呢個夢幻程度係癲㗎～！癲㗎～！！

本人實證係頂到120磅而唔斷嘅～當然唔可以當佢公園D千秋咁fing啦～～

繼續示範單位介紹：千秋後面就係大床，我地係喺龍貓個肚dum度訓覺嘅～

同蘑菇房一樣，上下2層都有被舖，喺貓巴士入面訓覺應該很爽皮吧～（老實講我真係好想入嚟，但張床好細XD）

樓上床位：冇貓巴士入面咁fancy，車頂係咁上下風光啦～勝在床尾有小小工具枱比小朋友玩

由上層望返落大床就係咁喇～～

點少得露台～連外面都畫埋畫，我每晚喺度執野冇冷氣，條氣都gur好多XD

露台後面就係浴室，又係成個泳池咁大！

終於訓醒嘅米豬出動摷玩具喇～！

今次真係好多謝老公比我圓夢，可以住龍貓屋～～開心到癲咗真係唔係一個過份ge形容！到而家，下星期去台北喇，米豬仲問我係咪去龍貓屋企⋯⋯（而今次只係book咗hea hea民宿⋯⋯）

約定咗細佬&表妹s，搵年我地全家包晒成楝嚟玩～！！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：米豬媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！