【我與肚內寶寶的約定】

生之前幾日，有一朝，瞓到矇矇鬆鬆，都唔知係真係假，突然好似同bb傾計，我同bb講：「妹妹呀，爸爸下星期一至五放侍產假呀，不如我地今個星期五出世囉！」佢踢左我一腳！我再講：「但爸爸星期五要同啲同事食飯，我地等埋爸爸食完飯返黎先出發好無？」佢又踢左我一腳！我睜開眼同爸爸講：「妹妹話星期五出世呀！」爸爸即刻驚訝咁講：「星期五？我去食飯喎！」我冷靜咁答：「我知呀！我地講好左話等你返黎先出發！」爸爸再問：「係咪真架？你地點溝通架？」我答：「我問佢星期五等爸爸食完飯返黎就出發去醫院好無，佢踢我囉！」爸爸用一個疑惑既眼神望住我講：「咁好啦！」

呢件我當然有同媽媽同家姐講啦！家姐星期五一朝早就whatsapp我，話自己已經準備好，差好部switch既電入醫院陪我生BB，夜晚家姐再whatsapp我：「你究竟有無同妹妹講清楚今日係星期五架？過左12點啦！」我覆佢：「我地話要等爸爸返黎先架麻，爸爸都未返！」

兩點，爸爸終於返黎啦！我就摸下個肚同BB講：「BB雖然已經過左12點，唔係星期五，但我地都可以隨時出發啦！」

四點鐘，我起身去廁所，一抹，係血呀！妹妹真係好聽話，真係等爸爸返黎就出發。我行返入房冷靜地叫：「爸爸，爸爸，流血啦！」慌張爸爸：「流血？流血！流血？」我就講：「冷靜啲！」爸爸醒一醒：「係！冷靜啲先，流血去沖涼洗頭先啦！」我見佢未醒咁樣就話：「好！你瞓多陣先啦！」爸爸笑下講：「而家邊瞓得著？你沖涼先啦，沖完我地去醫院。」一諗起12日唔可以沖涼洗頭即刻覺得要沖耐啲呀！哈哈！沖完涼，我用左宮縮app計宮縮次數同時間。嘩！原來已經5分鐘一次，都幾快喎！會唔會好快生得呢？當然啦，我實在太天真啦！即刻我都好緊張，話曬都要由元朗去St.Paul。六點，我地就call飛的入醫院。(待續)

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Wing媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！