新手爸媽必睇！拆解3大常見幼稚園選校迷思

好多家長可能都係首次為子女報讀幼稚園，唔知點揀好，加上坊間又有好多唔同嘅講法同意見，好容易人云亦云。今次集合咗一啲家長喺揀幼稚園時常見嘅疑問，為大家提供多一個參考。

1. 入到名校就冇後患之憂？

好多人會力谷小朋友讀名校，覺得入到名校就等於平步青雲。因此會好在意幼稚園嘅名聲，過去有幾多學童可以升讀到名校小學等。雖然出名嘅幼稚園定會有其優勝之處，不過亦唔係入到就冇後患之憂。唔少名校嘅教學進度都可能比較快同深，如果子女跟唔上，會好易出現挫敗感同壓力大，甚至影響佢哋學習，分分鐘弄巧反拙。

Photo from Mamidaily

2. 讀 Happy School 冇前途？

喺香港，唔少家長都比較抗拒Happy School，甚至會將佢定為負面。家長會認為Happy School係唔教書、唔使做功課，只任由小朋友玩足全日嘅幼稚園。其實大部分Happy School只係比較著重從遊戲中學習，針對小朋友全面發展，學校都會教書，不過會用較生動有趣嘅方法進行，提高小朋友嘅學習興趣，亦會有小量功課畀小朋友做，鞏固佢哋喺校園內學到嘅知識。

Photo from Mamidaily

3. 讀2間幼稚園 學到多啲嘢？

坊間有啲家長會教路，幫小朋友報讀2間幼稚園，一間免費，另一間私立，可以令子女學多啲嘢之外，家長亦有多啲自由時間。但其實應將心比己，成年人都未必能夠一日打2份工，小朋友一樣。上下午班中間只有1至2小時，要喺短時間內食飯、換衫，非常趕急。加上2間學校嘅課程、教學方法都不同，小朋友難以適應同消化。

Photo from Mamidaily

Text：Mami Editorial