細B好輸蝕？N班唔收？3大方法提升「戰鬥力」

唔少父母都會好擔心生細B好輸蝕，怕佢哋第時讀N班、幼稚園冇咁多選擇之餘，又擔心佢哋能力唔及大B。面試甚至學習時會比下去。不過，生B真係唔係你話幾時生就幾時生，其實就算係細B都唔使擔心，家長可以透過以下幾個活動，加強細B嘅能力。

1. 講故事

父母可以嘗試每日抽一啲時間，坐定定同小朋友講故事，咁樣有助提升小朋友嘅語言能力同想像力。另外，父母喺講故事時，不妨多運用唔同嘅表情同聲線，等小朋友更加投入故事嘅情節同角色之中，慢慢學識易地而處，顧及他人感受。

Photo from Mamidaily

2. 玩遊戲

父母可以陪小朋友玩遊戲，不論係卡牌、球類等都，透過小遊戲，除咗可以促進親子關係外，亦能夠訓練佢哋嘅腦部發展同手腳協調。不過父母亦要先同小朋友訂立遊戲規則，要佢哋遵守，教佢哋唔好計較輸贏得失，應該享受過程同要有遊戲精神，咁樣能夠令小朋友學識同其他人相處同禮讓。

Photo from Mamidaily

3. 戶外活動

父母應最少每星期同小朋友有一次戶外活動，去郊野公園、農莊、野餐等，畀小朋友有機會親身接觸大自然、摸索一下身邊嘅事物，而非單靠故事書上嘅內容圖案去了解，道理如「讀萬卷書不如行萬里路」一樣，有助增強小朋友嘅求知欲同認知能力。

Photo from Mamidaily

Text：Mami Editorial