4類熱門Playgroup 課程內容逐個睇！邊個先啱小朋友？

好多家長都會為小朋友報Playgroup。不過坊間愈嚟愈多Playgroup，各種類型都包羅萬有，究竟應該點揀先啱？今次就搵咗4類熱門Playgroup，同大家分析下佢哋嘅特色。大家不妨了解下，再決定幫小朋友揀邊一類！

1. 語言類

好多家長都會覺得語言類嘅Playgroup最實際。希望小朋友除咗母語外，更可以從小就開始接觸英文及普通話。呢類語言類嘅Playgroup，多數係透過一啲小遊戲或活動，畀小朋友可以邊玩邊學。由於語言需要多聽多講先可以學得快，大部分課程設計都會圍繞住小朋友嘅日常生活，例如以食物、交通工具、動物等作主題。此外，Playgroup導師基本上喺課堂上都會以該語言同小朋友互動，畀佢哋有更多機會多聽多講。

Photo from Mamidaily

2. 音樂類

音樂類Playgroup嘅課程多數包括唱遊、節奏感訓練及玩樂器等。小朋友聽到音樂，會好自然地跟住節奏手舞足蹈。家長唔好睇少依個舉動，喺小朋友郁動嘅過程中，可以訓練到佢哋嘅肌肉同手腳協調。另外，小朋友接觸唔同嘅樂器，如琴、手鈴、鼓等，亦可以令佢哋了解到各種樂器嘅特性，兼且刺激佢哋嘅聽覺。

Photo from Mamidaily

3. 感官類

初生至6歲前，都係小朋友嘅感官發展最佳時段。感官類Playgroup會利用多種唔同嘅物料，例如水、顏料、沙、豆、麵條、米等，設計唔同嘅遊戲。例如用手指沾上唔同嘅顏料，然後喺畫紙上進行創作、將唔同顏色嘅豆分類放好。小朋友喺玩嘅過程中，可以自行探索唔同物件嘅特性，從中提高佢哋嘅認知能力同好奇心。

Photo from Mamidaily

4. 運動類

運動類Playgroup可以畀小朋友有更多郁動嘅機會。呢類Playgroup會設計一系列體能活動同運動遊戲畀小朋友玩，例如傳球、跨欄、攀爬接力等，除咗可以促進肌肉發展外，仲可以同其他小朋友有更多互動，提升佢哋與人相處同合作技巧。

Photo from Mamidaily

Text：Mami Editorial