【一心餵奶粉 點知被母乳感動】

相信每個媽媽都經歷過不停餵奶嘅環節，其實由懷孕Day 1開始我已經好接受奶粉同母乳一樣係對bb有益，我覺得只要佢肯食飽瞓就無問題。所以小珍珠未出世，麻咪已經搜羅定有機無機，防敏牛奶羊奶，甜啲無咁甜，咩方向嘅奶粉都入定啲貨。

到左小珍珠出世，

喺醫院4日3夜入面，

每4小時會有特定時段俾媽媽去學習餵奶，

麻咪本人稱之為餵奶興趣班，

見到班內其他媽媽好緊張好積極去學習餵母乳，

而麻咪本人就確實有點hea..

( 其實只係太了解有啲事唔迫得，輕鬆啲面對! )

每次出現都只係為左抱下bb，親近下bb..

產後頭幾日興趣班都係俾媽媽同bb一齊學習下啲姿勢，

Bb當時其實應該係齋啜而無野到肚。

啜完空氣，話俾媽媽個腦知係時候造奶，

去到第3日，好彩嘅就會開始有粒豆咁多嘅初乳俾bb，

麻咪好記得果下係有開心到嘅，

無期望之下有驚喜!

出院後返到屋企，

頭幾日所有野都要重新適應，

包括家中各種擺設，生活作息時間，食療等等所有都以遷就bb為主。

壓力大到好快已經出現塞奶情況，

好彩陪月姨姨識得推胸，

雖然每一下都痛到入心入肺，

但知道通返之後先係對bb同自己好，

因為塞左會發燒，病左又照顧唔到bb，

所以一定要頂硬上!

( 生b係真係難關重重! 順產痛到驅魔人咁，出世再俾條小鯊魚咬到標眼水都仲未夠，塞奶仲要痛多穫! )

頭一星期泵平均都係30ml左右，

有時少到得5ml開始懷疑人生，懷疑個泵係壞嘅!

順道一提，個電泵配件同坐姿都好重要，

我好記得泵唔到幾多嘅呢個星期，

因為自己坐得唔好，個泵又唔fit size，

啲母乳喺個喇叭底漏哂出黎，

果下真係欲哭無淚。。。

第2週開始好轉啦，平均都有50左右，

我覺得呢個星期最大改變係2樣野，

吸收足夠水份 (炒米茶/ 上奶湯水.. )

同埋充足睡眠!

去到宜家第3週，平均去到100ml，

亦開始嘗試feed on demand，

瘋狂埋身又瘋狂泵奶，

開始麻目左咁去不斷做呢件事。。

(Btw, 每日都仲補緊奶粉)

我知道我絕對唔係上奶得最多最快嘅媽媽，

但我同bb一齊進步緊，摸索緊大家嘅步伐同習慣，

呢個過程每一對媽B都唔一樣，

雖然真係好辛苦，

但全部回憶都係獨一無二，

見到bb光速咁飲哂啲母乳，

然後又滿足咁瞓，

再辛苦再痛都會繼續每日循環咁去做。

特別鳴謝通宵更隊友: 老公 <3

佢為左俾麻咪瞓多幾粒鐘，每晚不辭勞苦咁獨自起身幫bb換片餵奶粉。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Stefani

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！