【父母的抉擇】幼稚園應揀半日制定全日制?

【父母的抉擇】幼稚園應揀半日制定全日制?

教育路
ByJacqueline on 04 Jun 2019 Senior Editor

喺報讀幼稚園時,好多家長都會煩惱究竟應該揀「半日制」定係「全日制」好?小朋友返「全日制」會唔會好辛苦?「半日制」又會唔會學少好多嘢?

香港嘅幼稚園大多數分為「半日制」、「全日制」。「半日制」上堂時間為上午9時至12時或下午1時半至4時半;而「全日制」為上午9時至下午4時半。而教育局嘅《幼稚園教育課程指引》,亦有列出「半日制」及「全日制」幼稚園安排嘅日常活動環節及時間分配例子,畀大家參考。

教育局
Photo from 教育局

「半日制」及「全日制」嘅上堂時間相差4個半小時,「半日制」只有3小時,而「全日制」就有7個半小時。好多家長怕小朋友讀「半日制」會學少好多嘢,因而卻步。

不過,港大教育學院做過一份名為「半日制與全日制幼稚園對香港幼兒發展影響的兩年追蹤研究」,喺377間同時提供全日及半日制課程嘅幼稚園中,隨機抽咗15間學校,共346名學童進行研究,當中160人係半日制、186人為全日制。研究發現,無論喺語言、認知、體能、社交及情緒發展各方面上,「半日制」及「全日制」嘅學童都冇明顯差別。所以家長喺考慮「半日制」或「全日制」幼稚園時,毋須太過擔心。

廣告
廣告

教育局
Photo from 教育局

另外,參與研究嘅幼教工作者認為「半日制」及「全日制」其實各有優點。幼教工作者表示「全日制」幼稚園可以令小朋友嘅生活方式更有規律,父母又可以有時間外出工作。而「半日制」幼稚園可以令家長同小朋友有更多相處時間,享受親子樂,促進親子關係,同時相對有較多校外學習機會。

教育局
Photo from 教育局

總括而言,為小朋友報讀「半日制」定係「全日制」幼稚園,其實並冇一個最佳方案,一切只有最合適嘅選擇。家長應從家庭同小朋友嘅實際需要 ,以及經濟狀況而作出考慮。

Text:Mami Editorial
Source:教育局,香港大學教育學院研究

Share to Facebook