【見鄰居妹妹被有情緒問題婆婆照顧 矛盾痛心情感湧上心】

因為工作關係，好耐無打專欄了，但近日身邊發生一啲事，令我又想同大家媽媽分享，同時希望可以好好發洩一下。

話說，轉咗工作後，返工時間變晏了，撞正幼稚園返學時間。有一日返學喺lift到撞到一位小妹妹。依位小妹妹媽媽比我仲要早懷孕，見證住佢由媽媽肚入面之後出世，但之後都好少機會見到妹妹媽媽，妹妹依家都大概K3大，一直見都係婆婆同公公湊。但公公對待妹妹態度唔算友善，有幾次見到都係見到佢對孫女呼呼喝喝，直呼佢「死八婆」都有聽過。但妹妹冇太大反應，同一般小朋友一樣，蹦蹦跳。

一直以來，我都係覺得「始終係人地家事/家家有本難念的經」有時亦會覺得，咁樣同小朋友講嘢唔好，但唔同正義到行埋去鬧人地點教小朋友咩，唯有興幸下自己屋企嘅老人家冇咁同小朋友講嘢，但其實內心覺得妹妹好可憐。

直到有一日，我見到妹妹拉住佢婆婆入中lift,當時妹妹用力拉住佢婆婆，但佢婆婆（行為似係有情緒問題）不斷話要拎垃圾，仲話「班衰人死晒去邊？」而妹妹說不斷話「夠鐘喇！我要返學呀！」但婆婆仍然唔肯入lift，不斷話要搵人，又話要有垃圾要執（但四圍都冇嘢）而我係lift到就忍唔住出聲「係唔係要入Lift呀？」當婆婆聽到我講嘢，又即刻入lift，但不斷四圍望，仲望住我，我當時扮無事發生，但又偷望下妹妹，但妹妹仍然笑咪咪，不斷望lift到未，但當到達大堂後，婆婆拉住妹妹，好似要讓我出先咁，咁我怕牽動佢情緒，所以扮冇事先走了。

Photo from Mamidaily

但當我離開大堂後，我不斷聽到，妹妹仍然拉住婆婆，仍然係話「夠鐘喇！我要返學呀！」其實作為媽媽，我心入面好心up,我覺得點解會要個情緒擺明有問題嘅人去照顧個K3小朋友？仲有，小朋友安全嗎？媽媽呢？點解會咁？

即使有好多疑問，但都市人就係怕被人話多事⋯⋯⋯⋯又無冇理會下去工作了，然後再自私想了想「自己屋企唔係咁就好了⋯⋯⋯⋯」

但依件事我遲遲都未放底，一直耿耿於懷，一嚟擔心妹妹，二嚟又討厭自己，結果夜晚我就同咗我媽媽（即薯蛋婆婆）分享，薯蛋婆婆就指，成棟大廈都知依位失智婆婆，都有人留意到，而且大家見到佢時，都會多加留意，但指「都幾年喇，個孫都被佢湊大喇！唔會有事嘅，唔好諗咁多」

但天意弄人，有一日我一見到妹妹返學，今次都係有婆婆帶住，同樣地都係稚覆上次嘅戲碼，但今次入到lift，婆婆妹似厭妹妹講會遲到，結果用力推咗妹妹一下，妹妹撞埋lift邊，我太緊張，講起「做咩呀你！」但婆婆又突然攬住妹妹，仲話「你個八婆唔好行埋嚟！」而妹妹反而相當冷靜，話「姨姨，我冇事」聽到妹妹咁講，我冷靜啲，但內心相當心痛。

妹妹只帶K3，相信佢都感覺到自己婆婆「有啲唔同」但佢好識保護婆婆，喺大家鄰居面前都裝著平常一樣，但依種其實先係「最唔正常」當時我都睇到妹妹雙手雙腳都有瘀傷，我唔知係去公園玩整親定點，我唔敢想像，我亦希望我諗多咗，但妹妹，真係冇事嗎？

Photo from Mamidaily

當時我決定做一次八婆，去到妹妹嘅幼稚園（妹妹著住校服，所以知道佢所讀學校）_我嘗試同老師描述事情，問問老師有冇發現？妹妹健康正常嗎？老師都好似一聽就知我講邊個，但只係答咗我"學生嘅事，我哋唔方便講，但我哋會多加留意，多謝提醒⋯⋯"

我只可以做到咁多，但我希望一切真的安好，一切只係我想多。

我都係一位單親媽媽，我知道咩係意外懷孕，一切都係計劃以外嘅事，突然要自己獨自承受另一個生命嘅責任係好大，更何況連自己都未搞得掂，一切都好似錯，懷孕係錯，生落嚟都係錯。我明白到，當見到小朋友就好似不斷提醒自己做錯事一樣，但你嘅世界有其他人，但小朋友嘅世界就只有你，「媽媽」。

老套講句，小朋友係無辜，我哋大人做錯了，點解要小朋友去承受？唔好一錯再錯，好好盡媽媽責任，重新令依個「錯誤」改變。佢會變成一個美好、甚至成為人生「最啱嘅事」，不論發生咩事，請好好愛惜你仔女，唔好要佢擔驚受怕，受到傷害。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：薯蛋媽媽
Photos： 薯蛋媽媽 & Mamidaily

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！