【升幼攻略】報讀幼稚園疑惑多！拆解6大常見問題

By Jacqueline on 03 Jun 2019

Senior Editor

雖然距離報讀2020-21幼稚園仲有一段時間，不過好多家長都會未雨綢繆，預早為仔女做足準備。不過，相信應該有唔少新手爸媽都係首次為小朋友報幼稚園，對於入學年齡、收生日期、申請方法等，可能都會有好多疑惑。今次為大家解答幾個報讀幼稚園常見嘅問題。

1. 入學年齡

根據教育局嘅規定，2歲8個月或以上嘅小朋友可以入讀幼稚園（K1），而預備班（N1）嘅入學年齡為2歲。不過家長要注意，如果喺9月開學嘅時候，小朋友未夠2歲，就必須要等小朋友滿2歲先可以入讀。

Photo from MamiDaily

2. 幾時開始招生？

每間幼稚園嘅收生日期都唔一樣，不過大部份幼稚園都會喺2019年8月至2020年1月期間進行招生，而10月至11月多為招生高峰期。為避免錯過咗申請期限，家長應預先向心儀幼稚園查詢招生詳情。

Photo from MamiDaily

3. 點樣拎入學申請表？

每間幼稚園申請方法都唔同，其中大部分學校都會要求家長直接喺網上申請、於學校網站下載申請表格、親身到學校索取等。家長應預先向心儀幼稚園查詢招生詳情。

Photo from MamiDaily

4. 有咩文件要準備？

通常喺申請表或學校網站上都會清楚列明所需嘅文件，大部分學校都會要求家長提供子女嘅出生證明書、父母身份證、半身近照、防疫注射記錄、家庭舊生證明等。

Photo from MamiDaily

5. 點同小朋友準備面試？

一間理想嘅幼稚園，應該要畀小朋友喺舒適愉快嘅環境中學習。因此任何入學面試都應以相同嘅概念，以活動形式進行面試，唔好帶畀小朋友有壓力。一般嚟講，幼稚園都唔會要求小朋友喺入學前必須具備任何知識，所以家長亦避免操練小朋友去應付面試，多啲畀機會小朋友同其他人一齊同溝通，等小朋友面對陌生人時都表現得淡定，唔抗拒同人溝通已經足夠。

Photo from MamiDaily

6. 邊啲幼稚園可保證畢業生能直升小學？

現時香港嘅幼稚園都係屬於私營，所以唔可以確保幼稚園畢業生能夠直升官立或資助小學。現行小一入學統籌辦法施行嘅主要目的，係為咗消除爭相進入較受歡迎小學嘅情況，以及減低對小朋友帶嚟嘅學習壓力。而私立小學、直資小學及英基學校協會屬下小學嘅小一學位，就並唔喺小一入學統籌辦法內，家長可自行為小朋友申請報讀呢啲學校。喺一般情況下，附屬於私立小學嘅幼稚園，其畢業生會有較大機會入讀該小學。