【「媽媽谷」有利有弊，視乎用家心態如何！】

By 禧。熙。之生活點滴 on 02 Jun 2019

我叫Mandy, 是一位80後全職媽媽和blogger, 育有兩位寶貝(禧禧同熙熙)。感恩能夠成為全職媽媽，可以見證及陪伴小朋友成長並透過日誌記錄禧&熙既生活點滴。喜歡鑽研烹飪，為小朋友煮岀有營食物，享受湊b生活並喜歡吃喝玩樂，行街及扮靚。

「媽媽谷」有利有弊，視乎用家心態如何！

曾幾何時我有懷疑過已經生左小朋友嘅朋友或同事點解要入咁多”媽媽谷”，但當時嘅我冇深入去考究，因爲我未有小朋友。但到左自己懷孕，開始入谷，已經唔記得係點樣入第一個懷孕初生谷, 入左谷之後，發現有好多育兒知識分享，又有實用產品推介，都慳好多時間唔洗自己硏究。入左一個大谷之後，開始進化入啲細嘅分支谷，分年份，分醫院，分區域，分BB年份/月份等等。

Photo from Mamidaily

之後禧家姐上playgroup，我都無入過任何有相關資訊嘅谷，可能當時覺得未有咁嘅需要，只係playgroup，都只係想俾BB岀去玩下，見下其他人，鍛練一下膽量。直到讀N班，有位好好嘅同班同學家長邀請我入谷，呢個N班媽媽谷係我入谷以來最好傾同時又最窩心嘅一個谷，媽媽之間會分享學校資訊，小朋友生活點滴，學習分享，婆媳相處問題，夫妻關係，扮靚心得及旅遊資訊等等話題，可以話係無所不談，亦從來感覺唔到家長之間會將孩子作比較。有時湊小朋友湊到心理開始唔平衡或抑鬱既時候，都會互相傾訴及支援，確實心靈上會感到好安慰。

Photo from Mamidaily

黎緊九月禧要入讀K1，過去幾個月，去左幾間幼稚園面試，繼而再入埋學校嘅面試谷及學位確認谷，感覺到部份家長開始發力想為小朋友揀選比較有名氣嘅學校入讀，大家都變左緊張大師，家長好積極發言討論每間學校嘅教學方針，升小比率，外補不外補，校風，老師質素等等呢類問題，喺你一言我一語又互相比較嘅情況下，某個媽媽谷已經聞到濃厚火藥味，一輪唇槍舌戰後，呢個谷已經無人再發言，可以話係不歡而散。個人認為加入媽媽谷有利有弊，視乎用家心態係點。對於我黎講，媽媽谷確實係一個可以交流育兒資訊嘅平台。