【便秘點算好？】5種水果潤腸通便 排毒又健康

好多人每日都會食1至2份生果，健康之餘，仲冇咁易便秘。當中大部分人都會認為香蕉係排便嘅好幫手，咁就要注意啦，隨時大錯特錯啊！皆因並唔係所有香蕉都係有助排便。未熟嘅香蕉含有一種叫鞣酸嘅成份，有好強嘅收斂作用，另外亦含有較多果膠，好難消化，導致便秘問題變得更嚴重。不過如果係黃色熟透嘅香蕉，含有較高嘅水溶性膳食纖維，就有助排便。其實除咗熟香蕉，以下嘅生果都有助大人小朋友排便，大家不妨試下。

1. 火龍果

火龍果含有嘅鉀質，可以將身體多餘嘅水分排出，仲有去水腫作用。另外火龍果嘅果肉含有一點點黑色呈芝麻狀嘅小粒，對腸道都好有益，同樣有排毒通便嘅功效。

Photo from MamiDaily

2. 麒麟果

麒麟果可以話係近年大熱嘅通便生果，佢同火龍果有幾分相似，不過味道相對較甜，食落有啲似燕窩，價錢亦較貴。麒麟果含有豐富水溶性膳食纖維、葉酸、鎂質及鉀質，有效促進腸道蠕動，幫助排便。

Photo from MamiDaily

3. 奇異果

奇異果含有豐富維他命C、纖維、葉酸、膳食纖維。當中維他命C嘅含量更遠多於蘋果嘅12倍，加上奇異果熱量低，營養價值高又能幫助消化，所以除咗潤腸通便外，亦係減肥恩物。

Photo from MamiDaily

4. 無花果

無花果含有豐富嘅果膠，可以幫助排出人體中嘅脂肪及膽固醇，仲能夠控制血脂。除咗通便，仲可以降血壓。

Photo from MamiDaily

5. 藍莓

藍莓有明目、護眼功效就眾所周知，不過其實佢亦有通便嘅作用。曾被聯合國衞生組織列為「最佳營養價值水果」嘅藍莓，含有豐富纖維素、維他命、鈉、銅及果糖，有潤腸通便，促進胃部消化能力。值得一提係，BB都可以食藍莓，如果BB有便秘問題，就不妨試下啦。

Photo from MamiDaily

Text：Mami Editorial