讀唔讀N班？家長必睇3大考慮因素

好多家長都會認為「小朋友早啲開始返學，早啲學到嘢」，因此喺讀幼稚園前，都會先為小朋友報讀N班。不過，究竟N班又係咪非讀不可？定係純粹抱住「人讀我讀」唔好輸蝕嘅心態？今次為大家分享幾個報讀N班應考慮嘅因素，大家不妨參考下。

1. 家庭背景

如果家長係全職照顧小朋友，可以親自教導小朋友，帶佢哋出外接觸到唔同嘅新事物，其實都係畀小朋友學緊嘢，仲可以從而建立更親密嘅親子關係，未必一定需要上N班。相反，如果家長需要返工，唔能夠經常喺小朋友身邊，陪住佢哋，甚至係將小朋友交畀外傭或長輩幫手照顧嘅話，就可以嘗試為小朋友報讀N班，畀外傭或長輩有個透氣位之餘，小朋友更可以透過N班適應群體生活，學習同其他小朋友相處、培養品德等。

Photo from Shutterstock

2. 小朋友情況

每個小朋友嘅學習能力都有差異，有啲細細個已經識聽識講，有啲可能母語都未識講，如果家長為咗令小朋友可以快啲學到更多嘢，而安排佢哋上N班，分分鐘會有反效果，隨時令小朋友變得更抗拒返學。除咗學習能力，亦要考慮埋小朋友嘅作息時間。充足睡眠對小朋友好重要，如果小朋友習慣好早起身，中午時段又再午睡的話，要佢哋上N班會比較辛苦。若家長為咗要小朋友上N班而刻意減少或調節小朋友嘅作息時間，亦唔係一件好事。

Photo from Shutterstock

Photo from Shutterstock

3. 學校環境

好多家長會因為口碑而選擇特定學校嘅N班，良好嘅口碑固然重要，但學校嘅位置亦係一個好重要嘅考慮因素，如果學校距離遠，小朋友返學需時長、唔方便，都會影響佢哋返學嘅意慾。另外，家長喺報讀前，應先親自了解學校嘅課程、環境、學費等，確保符合自己嘅要求，唔好盲目跟從其他人嘅選擇。

Photo from Shutterstock

Photo from Shutterstock

Text：Mami Editorial