6大媽媽最想要嘅母親節禮物

話咁又到母親節，相信各位孝順仔女諗咗好耐，究竟今年送咩畀媽媽好？一年一度嘅母親節，絕對唔使臨急抱佛腳，做媽媽嘅都唔想仔女嘥錢。即刻睇吓以下6樣唔使用錢，但又係媽媽心目中最想要嘅母親節禮物啦！

1. 心意卡
小朋友親手整嘅小手作，絕對能夠成為母親嘅收藏品。唔好睇少呢啲心意卡，到依家小編嘅媽媽仲不時拎返十幾年前嘅大作出嚟觀賞。所以仔女整嘅心意卡，就算簡單到得一句：「Happy Mother’s Day」，都一定係媽媽最想收到嘅禮物。

Photo from Shutterstock

2. 仔女聽話
平時成日激親媽媽，咁就要由今日開始乖乖聽話啦。媽媽最想仔女聽聽話話，唔亂駁嘴，媽媽開心，咁就係最佳禮物啦！

Photo from Shutterstock

3. 溫馨舉動
好多時對住親近嘅人，往往都開唔到口表達愛意。其實簡單到一個擁抱、一個錫錫或者一句「我愛你」，媽媽一定會甜到入心！趁住呢個佳節，快啲錫啖媽媽啦！

Photo from Shutterstock

4. 一家團圓
各位有咗自己嘅家庭，或者做咗媽媽後，係咪成日忽略咗自己嘅媽媽呢？母親節無非都係一個一家團聚嘅藉口，快啲約埋屋企人同媽媽食餐飯啦！媽媽最想見到嘅一定係一家人齊齊整整～

Photo from Shutterstock

5. 放假一天
唔係因為母親節喺星期日，就代表係假期。平時媽媽又要煮飯，又要做家務，仲要湊仔，母親節就畀媽媽偷懶一日啦！老公們，煮飯、洗手、掃地、餵奶，統統交晒畀你哋喇！

Photo from Shutterstock

6. 健康快樂
媽媽最想要嘅禮物，相信任何物質或者金錢都唔可以買到嘅！作為媽媽，一個被譽為史上最偉大嘅女人，100%最想係仔女健健康康、快快樂樂咁成長～只要仔女健康快樂，就心滿意足，唔止係母親節，仲係媽媽一生最好嘅禮物！

Photo from Shutterstock

Text： Mami Editorial