【請爸爸多多照顧媽媽 一個擁抱鼓勵已足夠】

唔知道各位媽媽坐月嘅時候有冇試過喊呢？聽啲老一輩嘅人講，坐月嗰陣唔可以成日喊，因為對眼會盲㗎 ！雖然你會覺得呢種講法係過於誇張，但其實我哋承受嘅嘢好多好多……好想同爸爸分享一下我地內心深感受

可能懷孕嘅時候你會覺得我哋對BB嘅感情未係好深厚，但其實當我地一生完之後，母愛就會即刻湧出嚟，無論BB發生咩事都好，其實我哋都會好擔心！特別係第一次做媽媽嘅我哋！佢食得多唔多奶、夠唔夠濕片，我哋都會好擔心！加上BB啱啱出世，可能會因為黃，而要去照燈，其實我哋都已經好想喊。喊並唔係因為我哋耐弱，而係因為我哋愛子深切。啱啱生完， BB就要離開自己，其實內心已經覺得好空虛，仲要擔心BB健康，真係好辛苦。

到出院之後，傷口都未好返，就已經需要無間斷咁樣去湊BB，每兩個鐘醒一醒，要去餵奶、換片，個人唔夠瞓，情緒自然一般，加上生完BB啲荷爾蒙調節得唔好，好容易因為小事而激動，例如大家最熟悉嘅產後抑鬱

我哋好多時都可能因為一啲小事而會覺得好炆憎，可能覺得自己照顧得BB唔好、自己唔夠奶、點解會瞓着咗聽唔到BB喊、點解啲片換完又換等等，呢啲小事都會令到我哋心情唔好，呢個時候請爸爸們體諒我地多一啲，唔好用一種訓話嘅方式同我地講說話，請用溫柔、或者一個擁抱俾鼓勵支持我哋。我哋理智上都知道其實已經盡咗力，但可能我哋情感上真係會比較脆弱…

加上由老婆身份轉做媽媽身份過程都需要適應，我哋唔係天生就識得做媽媽，我哋都係邊做邊學，當我地有做得唔好嘅地方，請你唔好責怪，唔好講一啲：「叫咗你㗎啦！」、「生得就預左」呢啲咁傷害性嘅說話！可能你哋平時溝通方法都係咁，但坐月千祈唔好講！反而係正面有安慰嘅說話，例如：「唔緊要，我地一齊學習，做好佢！」

同時亦請爸爸們保護我哋，最常見嘅婆媳關系往往都會係呢啲時候爆發，（唔一定係婆媳）唔係因為我哋唔相信照顧者，而係我哋啱啱做媽媽，所有事都會緊張啲，畢竟產後係會敏感啲，變到好似好唔滿意人哋湊BB嘅方法。

盡可能坐月都俾老婆有一個開心愉快嘅心情，我哋心情好，照顧BB先會有力繼續走落去，如果keep住成個坐月都喊，好容易會引起產後抑鬱，嚴重甚至會做傻事架！！

我都明白爸爸們角色轉變都大，又要返工，半夜又要照顧BB，可能你哋都會有負面情緒，兩夫妻之間記得多啲溝通，互相扶持行以後嘅路！畢竟女人都係易氹嘅動物！只要過左頭一兩個月，我地慢慢就會開始上手，到時情緒亦會相對無咁緊張架喇！

鍾意我嘅分享可以Like我地Facebook同IG比個支持我！會更快知道我既Update架！

Facebook：https://www.facebook.com/90sMummy/
Instagram: https://www.instagram.com/minarainlo/

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：90後P牌媽咪

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！