【聯合醫院生產篇:我媽咪食左全餐呀!】

【聯合醫院生產篇:我媽咪食左全餐呀!】

爸媽分享 mami熱話 孕媽Daily
ByDoris on 26 Apr 2019

Hello!大家好~我係軒軒 Marvin,我係3月7日係聯合醫院出世。

呢一次我媽咪想同大家分享係聯合醫院生我出黎既過程,我出世8磅幾係一個大B(媽咪最後一次產檢既時候我都仲係6磅幾,醫生話我出世最多都係7磅幾唔會咁重,媽咪話一早知道我咁重就開刀生我啦!)因為我媽咪食左全餐。

本來我媽咪嘅預產期係3月4號,但我喺媽咪嘅肚入面太舒服喇,我根本都唔想出黎。3月5號嘅朝頭早,媽咪發現流啡,所以媽咪同爸爸就即刻入醫院~

當時媽咪個心情係’嘩!BB終於肯出黎啦!’媽咪一早已經執好哂走佬袋喇~媽咪同爸爸就去到聯合醫院嘅產房準備檢查同埋上病房啦~因為每一個媽咪流啡嘅情況都唔同喇~有D媽咪流啡完好快就有陣痛,有D媽咪就好似我媽咪咁,流完啡之後隔左一兩日先出黎。

媽咪5號入院,一直都冇特別嘅反應,去到6號嘅朝早醫生黎檢查問媽咪想唔想出院,媽咪緊係話想喇~醫生就檢查一下,發現開左兩指,醫生就對媽咪講,依家我開左兩指,唔好出院喇~因為分分鐘都要返返黎架喇!

醫生檢查完子宮之後,因為外來嘅刺激同埋醫生有按摩一下子宮,之後會出現流血同埋有少少痛係正常嘅!一直到下就媽咪訓醒一教之後,發現好似有D發燒(媽咪提提各位準媽媽,係待產嘅時候,每次去完洗手間每次接觸完其他野,一定要洗乾淨隻手,因為醫院嘅洗手間係好污糟好多細菌,我媽咪就係因為洗手洗得唔乾淨所以細菌感染發燒)姑娘知道媽咪發燒之後佢地都好緊張。隨後媽咪開始陣痛,再發現我嘅心跳又開始好快,醫生都黎左幫我地兩個檢查。醫生檢查完之後,就決定落產房準備人手穿水。

去到產房嘅時候,媽咪已經冇發燒我嘅心跳都正常返。醫生就幫媽咪人手穿羊水啦(媽咪話之前聽人地講話人手穿手會好痛㗎!但媽咪就話其實一D感覺都冇,醫生幫媽咪穿左手之後,媽咪仲問醫生穿左㗎喇?)穿左水之後就開始陣痛加劇喇,陣痛嘅次數都越黎越密。

呢一個時候姑娘就會問媽咪要唔要聽D音樂呀?要唔要聞笑氣呀?媽咪緊係兩樣都要哂啦!每一次陣痛嘅時候,媽咪痛到連笑氣都遞唔到黎聞,好采有爸爸幫媽咪手,每一刻都留意住媽咪。媽咪話之前聽人講聞笑氣會聞到好想嘔,又有好大陣膠味,原來係真!聞到媽咪又暈又想嘔,但唔聞又好痛好痛。陣痛左兩個鐘,醫生入黎檢查媽咪同我嘅情況,但發現我嘅心跳越黎越快,媽咪人手穿水同打催生針之後都冇開過任何度數。醫生就決定同媽咪緊急開刀……呢一刻媽咪痛到都唔識驚啦,淨係想我快d出黎,但爸爸嘅心情就好緊張啦~

廣告
廣告

護士姐姐就推左媽咪同我去手術室,當時媽咪仲keep住陣痛,但因為麻醉嘅時候需要屈曲個身體,大家試諗下本身懷孕嘅媽媽去做呢個動作已經係好難,何況我媽咪係keep住陣痛一路要做個蝦米既動作,個陣好多醫生同護士姐姐都鼓勵媽咪。打完麻醉針之後,媽咪話簡直係天堂呀!因為媽咪已經感受唔到痛啦。之後其實一d感覺都冇既,手術既過程中,醫生都一路講解緊做咩,令到媽咪冇咁擔心。之後醫生講左句:依家你會感受到扯扯地感覺,因為我地會將bb拎出黎。之後就聽到我嘅喊聲,我就出左世啦!

護士姐姐幫我做完檢查之後,因為我有d發燒,所以比媽咪錫左一啖之後,我就要去病房啦!但媽咪嘅情況就唔係幾好啦,因為手術差唔多完成嘅時候,媽咪嘅血壓突然跌到好低,醫生話:唔可以上病房住,因為佢血壓好低,出去觀察先,如果情況keep住係咁,就入icu。(當時其實媽咪已經因為血壓低暈左,只係聽到外界嘅聲音,咩都睇唔到,最後聽到嘅對話就係呢個)好好采嘅係媽咪過左2個鐘之後情況開始好轉,醫生可以比媽咪上病房啦!

上到病房之後,媽咪話個到有好多bb,又見到好多媽咪岩岩生完就要照顧bb,但因為我出世發燒所以我就唔可以同媽咪一齊要係初生嬰兒病房,咁樣媽咪每日就落有房到比奶奶我。過左一星期我就出院,遲左媽咪3日出院,因為我要打一星期嘅0抗生素。

(我喺病房個陣,爸爸拖住我隻手仔)

我同媽咪好想喺到多謝聯合醫院嘅醫生同護士姐姐,因為佢地照顧得我同媽咪都好好,喺初生嬰兒病房嘅時候,每一個護士姐姐都好好,好有愛心咁照顧我,雖然佢地要照顧好多bb,但佢地都好盡力做好佢地嘅本份。至於媽咪呢,媽咪都好多謝係產後房嘅護士姐姐,佢地好好,成日都好關心媽咪,因為我同媽咪喺唔同嘅病房,所以每一個夜晚護士姐姐都會提媽咪要手擠奶比我,有時媽咪嘅手勢唔啱,護士姐姐會親手教你,好多時都會鼓勵媽咪。如果各位準媽媽有咩問題可以隨便問呀?因為我媽咪知道好多準媽媽都對醫院嘅生產過程好好奇,所以佢都希望可以幫到大家~

==============================

Text & Photos:Doris

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Share to Facebook