小朋友便秘點算？潤腸通便 決明子菊花茶

好多小朋友都鍾意食煎炸食物，但又好拒抗飲涼茶。大家不妨試下焗呢個決明子菊花茶畀佢哋飲啦。菊花有清熱解毒及明目嘅功效，而決明子可以降低血壓、促進新陳代謝，小朋友如果有便秘問題，就更加要飲多兩杯啦。

材料：

決明子 10克
菊花 6朵

做法：

1. 將決明子及菊花洗淨
2. 放入杯中，用熱水焗10至15分鐘
＊可以反覆加熱水沖泡

雖然做法簡單方便，不過並唔係人人都適合飲菊花茶，以下3類人士要留意。

1. 菊花過敏者

若果對菊花過敏，飲完菊花茶皮膚會出現紅腫、紅疹等過敏症狀，就唔適合飲用啦。

2. 孕婦

由於菊花茶性寒，孕婦嘅免疫力比較低、脾胃較為虛弱。菊花茶容易刺激腸胃，有可能會出現肚痛腹瀉等症狀，所以要避免飲用。

3. 老人

雖然菊花茶有降血壓嘅作用，但老人家同孕婦一樣，脾胃較為虛弱，菊花茶可能會對佢哋嘅腸胃造成傷害，所以不適合飲用。

Text：Mami Editorial