美國研究：原來大肚真係可以傳染！

大家嘅朋友圈子入面係咪又有人大肚啦？原來已經有科學家證實懷孕係有傳染性，難怪朋友一個接一個咁有BB啦！

有科學家喺美國社會學學會（American Sociological Association）出版嘅期刊中，發表有關嘅研究報告。呢個研究搵咗大約1,720名女性，並持續咗10年時間。研究人員由佢哋15歲嘅時候開始觀察，到最後發現有超過一半嘅參加者生咗BB。

Photo from Shutterstock

研究人員指，佢哋發現呢種「傳染」效應只會係短期同埋係倒U形（inverse U-shaped）嘅。當見到朋友已經生咗嘅時候，自己生兒育女嘅意欲亦會隨之增加，不過兩年後就會達到高峰，然後慢慢減少。

專家表示懷孕會傳染有以下4個原因：

1. 當你見到朋友教導小朋友，會增加你養育仔女嘅自信心。

2. 見到朋友有小朋友，已經踏入人生新一頁，可能會有「唔想落後」嘅感覺。

3. 呢個研究亦都發現你將來會生幾多個小朋友，亦可能由你朋友決定。當見到一個朋友可以同時睇住幾個小朋友，亦會增加你嘅信心去養更多嘅仔女。

4. 以成本攤分（cost-sharing）嘅角度嚟睇，可以同朋友分享一啲BB用品，或者帶小朋友出去玩時，有人同你分擔一切同育兒有關嘅成本。

研究人員認為，朋友嘅生育經歷係一個重要嘅學習來源。因為佢哋經歷過呢件事，可以提供相關經驗同資訊，例如點樣過渡成為父母身份。

朋輩嘅影響絕對係推動力，姊妹有咗BB嘅話，下一個可能就到你啦！

Text：Mami Editorial
Source：American Sociological Association