受盡閒言閒語 爸媽1個原因堅持照顧囡囡

孩子永遠都係爸媽嘅心頭肉，無論長成咩樣子，喺爸媽眼中只要係自己親生嘅都愛～即使照顧小朋友時會遇到好多困難，但都會帶住小朋友一步一步走到最後。內地黑龍江有位農村媽媽就確實證明依句說話係真嘅。

Photo from 天津衛視

劉媽媽一臉幸福樣子帶住患有先天性軟骨發育不全嘅16歲囡囡，參加內地一個電視節目，當眾人見到囡囡時都不禁嘩然，眼睛都流露出一種既可惜但同時敬佩嘅眼神。

16歲囡囡劉爽先天骨質欠缺一種生長激素，導致軟骨發育不全，雙胯脫臼，雖然已經16歲，但身高只有64CM。由於農村醫療發展未似城市一樣完善，喺爸媽懷孕時，所照嘅超聲波都只有黑白色，醫生護士誤以為劉爽一直發育正常，結果到囡囡3個月時發現唔妥，身高發育情況越嚟越緩慢，當時醫生就發現，囡囡係發育不全，屬於先天性問題，係冇治療希望，所以多次建議劉媽媽放棄囡囡。

「因為我同老公一直希望有個囡囡，上天就真係畀咗個囡囡我，無論如何，我都會好好照顧佢！」劉媽媽同老公好堅定咁同醫生講。被問到喺照顧囡囡時嘅生活，劉爸爸同劉媽媽眼泛淚光話：「帶小朋友出去時，受到異常眼光已經成為習慣，最難聽係聽過有人指住囡囡話"為什麼長得像猴"」媽媽更時不時因為依啲事抱住囡囡偷喊，但與其他人爭吵，反而令到囡囡更難堪。

為人父母，劉爸爸同劉媽媽半秒想放棄都冇，仲話「無論點都好，佢都係我最愛嘅寶貝！」

Photo from 天津衛視

劉媽媽仲有一個仔仔，仔仔已經14歲，健康發育，而且會幫劉媽媽一齊照顧家姐，但當講到仔仔時，劉媽媽更加哽咽，「我虧欠仔仔，因為我全副心機都放喺囡囡身上，到仔仔識行路後，我幾乎無抱過佢⋯⋯」但見到囡囡同仔仔嘅姐弟情又窩心起上嚟。

跟劉爽同齡嘅小朋友都上中學讀書，但劉爽語言上仍然跟唔上，思維上亦都只係好似BB咁，但劉爸爸同劉媽媽都決心要照顧囡囡：「囡囡能夠活幾耐，我哋就會照顧佢幾耐」

其他人嘅孩子一日一日長大，但對於劉媽媽嚟講亦唔係每日都沮喪，反而覺得囡囡能夠活着就係自己最大嘅希望，而且更覺得囡囡其實好懂事，因為不斷努力長大，開始可以自己走 ，自己食飯，雖然做唔到太多野，語言上都跟唔上，但係旁人嘅小進步，就係囡囡嘅一大進步。

Text：Mami Editorial

Sources：天津衛視