改名除咗提升運氣最緊要係小朋友開心

By Circle on 11 Apr 2019

Digital Editor

「唔怕生壞命，最怕改壞名」，改個好名真係好講究，好多爸爸媽媽可能都會搵專人幫手。早前喺ViuTV一個玄學節目入面，就有玄學師傅分享點樣幫小朋友改名先係最好。

舊時好多家長都好抗拒畀人知自己仔女個名係搵人改，反而現今世代就完全相反。玄學師傅表示改個好名，除咗期望可以提升運氣，最大個嘅原因就係想令人生變得更好。

Photo from 《點相》節目截圖

佢認為幫小朋友改名切記唔好用多音字。以「茜」字為例，有人讀「善」（sin3），亦有人讀「西」（sai1）。試想像一個小朋友，由細到大去任何地方，小至朋友聚會，大至公眾地方，就算喺學校連老師都讀錯自己個名，真係對心理有好大嘅影響。

當遇到不常見嘅字而又唔知讀音嘅話，通常都係有邊讀邊。玄學師傅又以名字「王烻燰」為例，好多人都會讀「王延愛」，其實真正嘅讀音係「燕」（jin3）「偎」（wui1）。如果為咗配合八字同五行而接受一啲奇怪名字，或者有幫到小朋友改善運氣，但更大機會係令到佢過得唔開心，令佢有童年陰影，小朋友真係會開心咩？最後可能只會得不償失。