【宮頸厚未有想開意欲 媽媽心想：有排痛喇～】

上一篇講到孕後期先話魚B胎位不正同埋中左B鏈球菌，係安慰自己到時先算嘅第2日....

2月7號, 好似河馬嘅我好論盡咁喺晚上同屋企人食左團年飯(因為除時生,所以提早一齊食)番到屋企仲執左陣走佬袋既野..就去沖涼洗頭...沖完涼一熄水，一踩落個地墊..我聽到"卜"一聲...我即刻大嗌魚爸，佢走入黎，我話好似穿左水呀!!著番衫，入房吹頭，仲諗緊會唔會好似上次咁呢"食詐糊"以為穿左水，入到去又內診又開鉗(驚)我好細動作咁吹埋個頭..想去次小便用試紙CHECK下先..拎好小便樽準備小便既時候..又"卜"一聲..個小便樽已經裝左好多好混濁既水...魚爸拎到試紙入黎，我話唔駛啦，穿左，幫我CALL白車...個陣我除左穿水，一D痛都無..慢慢換好衫我就坐定定等白車黎..

白車黎到，警察同救護員都會問問媽媽幾多週，第幾胎，有冇痛等等..我屋企離東區醫院都好近..大約10-15分鐘車程就到..不過因為我0嗰陣已經係晚上11點..到左醫院就去左急症室先登記再直上7樓產科..

到左產科就入左一間檢查房，姑娘都會問問基本媽媽資料，幾多週..為保障自己，我都不厭其煩提姑娘我有B型鏈球菌..B型鏈球菌..B型鏈球菌(十分十分之重要,真係要講3次)，等到醫生黎幫我檢查(係實習醫生)..因為要確實係咪穿水，要先用鴨咀鉗檢查..之後叫我咳2下..再用試紙CHECK分泌..一咳已經FEEL到好多水流出黎，醫生話"仲唔係穿水..HAHAHA"...個下我話應該係啦XD跟住，醫生要伸手內診，睇下宮頸開左未..雖然係男醫生，但生BB呢D野都無話尷唔尷尬..一檢查完，我D羊水就好似倒出黎咁..接住有個產科既資深醫生入黎..同我講我宮頸好厚，完全未有想開既意欲，因為有B型鏈球菌，所以會幫我吊針催生...(驚)

換好衫，姑娘話會推我去產房，魚爸就會係我安頓好先黎產房陪我..我忍唔住問姑娘..咁快產房，我生得啦？(以為可以咁快 XD)姑娘話第一胎..B型鏈球菌+催生..一定去產房等..仲話預左有排痛...
當下好驚，不過都要頂住..唔係仲可以點..XD

入到去產房，所有跟身物件，電話、銀包、咩都放低喺LOCKER..有個媽媽問可唔可以拎電話同銀包，其實我好想答佢生BB幫到你既只有醫生助產士..XD入到產房姑娘開始幫我吊催生針同打抗生素針..同埋提我，一陣會開始慢慢痛，因為第一胎，加宮頸厚，催生唔會咁快開度數..起碼6小時後先有醫生再黎內診檢查...到時好大機會一度都無，先再繼續吊針等佢開..超過24小時唔開先會開刀..
聽完心諗..咪有排等..

吊好針，望下個鐘..1:07分..魚爸入黎啦...問我痛唔痛，個陣就好似dd m痛..

1:30分，我真係計住4分鐘一次..姑娘話有排呀...唔好睇鐘啦..XD
2:00..我開始感覺到愈來愈痛 ，3級左右啦(以十級黎計)
初開始我同魚爸一齊喺到數234吸.234呼...係有D用既..
但唔夠10分鐘，個痛已經係八級..我開始不停抖大氣有個姑娘好好不斷幫我，每一次痛大概30秒，初頭我係忍到既，但好快我覺得係10級要求救..魚爸仲比我打左一拳(唔好意思 XD)我好似白粉婆咁問姑娘有冇止痛針，佢話咁快打左之後就無..建議我先聞笑氣，個下唔好理，咩都要..我跟住指示，一痛就鼻吸口呼..真係痛小好多...一路聞..一路聞..突然覺得好急屎..係忍唔住想用力屙...而魚爸見到部機我宮縮好規律，大約2分鐘就痛一次..我就係咁同姑娘講好急，姑娘睇左部機就叫魚爸出一出去，叫醫生黎睇我～

而我就好努力吸笑氣，突然感覺又再內診一次..聽到有人話唔好再聞笑氣啦太太，我仲好迷糊問，做咩事呀？唔好搶我舊野啦...XDXD之後有把女人聲話，開晒啦，10度啦，BB頭髮都見到啦，準備生啦~!!

個下我都望一望個鐘，4:02分..心諗咁快既..."XDXD開始生啦..個陣魚爸入番黎，已經見到我痛到癲左..好似一隻猛獸..醫生叫我一宮縮深呼吸一下..出力..我真係出盡力..第一下已經"0拍"左一聲.."應該爆左會陰"再黎第2下..已經FEEL到BB個頭出左黎，再黎第三下，我感覺到好大舊屎出左黎咁...

終於生左啦...姑娘幫BB抹完身抱比我..我第一句同BB講..HELLO !!我都問姑娘佢出黎既時候面向邊到，姑娘話BB面向我..即係話佢真係轉左身先出黎:)
跟住姑娘就抱BB沖涼..因為我仲要推番胎盤出黎..由BB出世，要喺30分鐘內拎番胎盤出黎，唔係既話就會產後出血..我望住個鐘，時間一分一秒咁過，胎盤都出唔到，仲聽到話胎盤痴住左子宮，用力拉會扯埋子宮..要準備手術室CALL醫生..我空白左..諗會唔會就咁死左..BB同老公都未睇清楚..
跟住0係最後一分鐘，換左另一個助產士試下..而我都好努力用小小陰力幫手排出黎..最後係成功拎到出黎，仲聽到佢地數個胎盤完唔完整..

之後姑娘比我抱番BB黎縫針..因為會陰生既時間爆開左..縫完針，魚爸可以坐番埋黎一齊睇BB..睇住佢搵媽媽食奶真係好神奇，姑娘仲幫我地影左全家幅，我個生產過程由吊針到生左魚B..全程3個半鐘...
第一胎已經好好好快..

總結:
生產過程真係好痛，我可以形容為全身骨折再比人拉起身打一樣...XD
但有魚爸陪我順產生BB 喺我地人生上面係一個好好既回憶..
雖然痛..但值得回味

小知識:

B型鏈球菌
四分之一的育齡婦女帶有B型鏈球菌，雖然媽媽沒有任何症狀，但新生兒卻會遭感染。除了急性感染外，小孩可能在學齡期出現聽力、視力問題，甚至變成腦性麻痺兒。如果無打到抗生素針，伯有機會生產過程中，新生兒經過產道時，會遭到感染... (所以各位準媽媽記得去做呢個檢查呀!! 公立醫院會預約媽媽35到37周時，接受陰道和肛門直腸的B型鏈球菌篩檢)

聯絡我或產品試用:[email protected]
facebook page : @haileybabywhy (hey魚b之日常)

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：Hey!魚媽媽
Photos： Hey!魚媽媽 & Shutterstock

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！