快樂原來好簡單 令爸媽感到幸福滿溢5件日常小事

自從BB出世後，爸爸媽媽終於明白到做父母原來唔係自己想像中咁簡單同輕鬆，淨係餵奶、換片、掃風、安撫喊緊嘅BB、洗奶樽都幾乎佔去全日清醒嘅時間（連半夜瞓瞓下覺都要起身餵奶）！呢一刻，爸爸媽媽先知道以前自己隨意揮霍嘅時間係幾咁可貴，更發現到喺湊仔生涯中，以下呢5件日常事原來可以令自己好開心！

Photo from shutterstock

1. 可以一覺瞓天光

半夜一聽到BB喊，爸媽都會即刻驚醒衝去BB床前，一邊抱起BB安撫，一邊準備餵奶俾BB，尤其係初生階段嘅BB更令爸爸媽媽疲於奔命。無論幾眼瞓都好，總無法可以好好休息一覺瞓天光，每日都期待著BB可以盡快戒夜奶、夜晚唔會無故扎醒⋯⋯有時「幸運」地可以連續瞓到5個鐘以上，爸媽已經感到非常幸福！

Photo from Shutterstock

2. 有時間出去二人世界食餐好

唔好話出街，就算喺屋企都要時刻盯著BB、或被BB跟到實一實，絲毫無私人時間可以好好地食完一餐飯、去個廁所或沖個涼，無時無刻處於趕頭趕命狀態，如果有人可以幫手睇住BB，等自己兩公婆可以出去食餐飯、行下商場買下嘢，爸爸媽媽已經覺得好滿足，又係時候返屋企湊BB喇！

Photo from Shutterstock

3. 可以完整睇完一集劇集／電影

基本上要坐定定睇一場兩個鐘以上嘅戲係冇咩可能，好多時BB都會喺劇情進入高潮位就扭計或哭喊，打斷爸爸媽媽睇戲嘅緊張感，就算幾想睇落去都好，都要第一時間顧掂BB先，當安撫好BB後，已經錯過咗好多重要嘅劇情喇！

Photo from Shutterstock

4.BB有便便

以前成日聽廣告話BB有便便，總感覺有咩大不了，BB有便便唔係好正常嘅事咩？BB出世之後先發現原來少少飲食唔同咗、奶粉唔適合或飲少咗水都足以令BB幾日都屙出出，甚至便秘屙出硬便便刮損肛門而出血，見到BB痛苦嘅模樣，連爸媽都非常心痛！當BB幾日冇大便，爸爸媽媽就好似變成「望屎石」，日日都期盼著BB嘅便便，到終於見到BB有便便，真係會開心到想喊㗎！

Photo from Shutterstock

5. BB瞓晏覺

BB清醒嘅時候冇得瞓，但當BB瞓晏覺嘅時候，爸爸媽媽更加唔想瞓！因為終於有自己嘅私人時間，可以盡情做自己想做嘅事！

Photo from Shutterstock

Text: Mami Editorial

Photo Source： Shutterstock