BB贏在起跑線？ 孕媽咪日嘔夜嘔原來有好處

多達80％嘅孕婦受到孕吐影響，如果喺懷孕嘅時候，畀孕吐嚴重影響心情、生活、甚至夫婦關係嘅媽媽，唔使唔開心住，因為原來孕吐都有好處㗎！

加拿大多倫多病童醫院（The Hospital for Sick Children） 研究人員發現，喺懷孕期間有嚴重孕吐嘅媽媽 ，包括妊娠劇吐（Hyperemesis Gravidarum），孩子嘅智商原來會高啲。

呢個研究一共搵咗121個年齡介乎3至7歲之間嘅兒童，當中有啲小朋友喺媽媽陀佢哋嘅時候，有嚴重嘅孕吐。專家們發現呢啲小朋友喺智商、記憶同語文能力嘅測試中得分比較高。因此，專家認為與孕吐有關嘅妊娠激素對胎兒大腦發育有好大嘅作用。

首席研究員Irena Nulman博士指，研究結果顯示：懷孕期間嘅噁心和嘔吐唔止無害，實際上仲可能有利於兒童嘅智力發育。

各位媽媽聽完呢個結果之後，係唔係即刻冇咁討厭孕吐呢？

Text：Mami Editorial
Source：加拿大多倫多病童醫院研究