囡囡芭蕾舞比賽落敗吳尊忍痛講道理

By race.cheng on 09 Apr 2019

要教小朋友咩係失敗、咩係「要享受過程」等等嘅道理都好難用一言一語表達，有時難免要小朋友真正經歷失敗先可以借住學習，而今次吳尊就要忍痛教囡囡NeiNei「過程比結果更重要」嘅道理。

事源吳尊囡囡NeiNei參加咗亞洲國際芭蕾舞大賽，可惜最後落選，而囡囡更因無法接受結果，當場情緒低落，忍唔住痛哭，爸爸吳尊見囡囡失落獎項都好心疼，但直言指「要慢慢讓她明白過程比結果更加重要」。

吳尊指，Neinei從3歲開始就開始學芭蕾舞，為咗今次嘅比賽幾乎每日每夜都不斷苦練，而且今次係囡囡第一次個人演出，而囡囡亦一直同屋企人講好想赢，但吳尊都知道，囡囡嘅程度都暫時未能跟海外比，加上囡囡係全場最細又係第一個出場，某程度上都會影響表現，但都希望囡囡可以見識下，吸取經驗，坦言自己都有定心理準備，覺得最後畀囡囡感受失敗都唔係壞事，自己覺得囡囡已做到最好就已經好驕傲。