原來BB比想像中更聰明！常令爸媽驚喜萬分5件事

媽媽對於BB嘅第一印象，係連飲奶都唔太識嘅懵懂模樣，抑或係對身邊所有事物都一無所知呢？但隨著BB開始長大，媽媽會發現到原來BB喺不知不覺間，已悄悄學識好多嘢，令媽媽非常驚喜！

1. 聽得明好多說話意思

總以為大人間嘅對話BB會聽唔明，不過有時會發現當講到BB嘅時候，BB會擰個頭過黎望到大人實一實，有時仲會插嘴表達意見，先會令大家驚喜發現原來BB雖然唔識講，但有好多單詞同句子都聽得明，仲會想同大人交流添！

Photo from Pinterest

2. 知道事情嘅先後次序

食飯前要先洗手、著飯衣、坐highchair⋯⋯日日如是，聰明嘅BB開始一聽到媽媽講：「飯飯～」、「mum mum」等就會識得自動自覺走到洗手間門前、指著飯衣或自行想爬上highchair，唔洗等媽媽叫就會去做～

Photo from Pinterest

3. 好快模仿出曾見到嘅動作

出街見到有老人家撐住柺杖行路、見到爸爸媽媽吹涼粥仔⋯⋯非常好學嘅BB都會立即模仿返出黎，逗得爸媽開心不已！

Photo from Pinterest

4. 認得事物嘅擺位

驚BB會去拎而喺BB面前收埋啲嘢，以為BB就會搵唔到？聰明嘅BB已經記實目標物嘅位置，當爸爸媽媽一行開，就會自己走去拎，甚至叫其他屋企人幫手拎俾自己，尤其係BB最愛嘅餅餅零食。

Photo from Pinterest

5. 肢體能力

喺媽媽心目中，公園嘅設施都有機會為BB造成危險，所以無論BB玩騎馬仔又好、瀡滑梯都好，都一定會扶住BB小心翼翼咁玩，深怕BB會唔識玩而跌落黎受傷。但原來BB睇人玩得多，或自己已試玩過好多次，已經識得點樣去瀡滑梯，見到BB有意識點樣去運用手腳玩，媽媽都會感到好驚訝同開心！

BB每日都進步得好快，已經唔係當初對世界同自己物體一無所嘅新生命，當見到BB學識嘅嘢愈黎愈多，亦意味著媽媽要適時放手，俾BB有多啲唔同嘅嘗試去認識世界。

Text：Mami Editorial

Photo Source：Pinterest