成為媽媽後有咩唔同咗？自然會養成呢5個小習慣

如果問：「做咗媽媽有咩唔同咗？」相信所有媽媽都一定能夠滔滔不絕大講自己覆天覆地嘅生活轉變：身材走樣、冇覺好瞓、冇自由、忙到癲⋯⋯好多好多負面消極嘅念頭湧晒出黎。若再追問：「有BB開心嗎？」媽媽又會即刻露過冧樣出黎，表示一見到BB就會幾辛苦都覺得值得。可見BB為媽媽帶黎嘅影響力真係好大，除咗令媽媽心情變得複雜矛盾外，亦會不知不覺令媽媽養成呢5個小習慣。

1. 愛聞BB頭同腳

BB身上總有一股奶香味，非常吸引媽去猛索BB個頭，一聞就會感到非常減壓！有啲媽媽亦會好鍾意聞BB嘅臭腳仔，覺得自己BB所有部分都係最乾淨！

2. 無時無刻拎手機影低BB個樣

好多時會發現爸爸媽媽手機內，差唔多角度、背景、BB表情嘅相總有幾十張，但爸爸媽媽就一張都唔捨得刪，喺旁人眼中影得唔靚或者差唔多嘅BB相，對爸爸媽媽而言就係非常珍貴，刪咗就影唔返嘅重要時刻。

3. 會沉醉望住BB熟睡小臉

BB醒著嘅時候就會哭喊得令爸媽怕怕，但係一瞓著就好似天使一樣安詳可愛嘅小臉，令媽媽可以笑著望好耐都唔厭。

4. 同任何人嘅話題一開口就係BB

成為媽媽後，BB就係媽媽世界最重要嘅存在！滿腦子都係BB嘅媽媽，自然同任何人嘅話題都離唔開BB。就算本身嘅話題係同BB完全無關，媽媽總有辦法傾到去BB身上，想同大家一齊分享自己BB嘅有趣事。

5. 仔細觀察BB嘅便便

BB有便便對媽媽而言係最大件事！每次BB屙完便便，媽媽都會唔怕污糟同臭味，仔細觀察甚至撩開便便睇下形態、顏色、氣味、食物殘渣去推斷BB消化吸收得好唔好。

Text：Mami Editorial

Photo Sources： Shutterstock