【一句話惹毛在職媽媽：有工人姐姐都唔會太辛苦啫！】

「你就好啦，屋企有工人姐姐幫輕下，應該都唔會太辛苦者！」一句無心說話，足已令在職媽媽斷了理智線。

對，我家的確有工人姐姐，同時亦係自小JM出世以來第二位的工人姐姐。
回想起聘請第一位姐姐的過程及經歷，都不禁令人有點失望。小JM爸在小JM出世前4-5 個月左右，已經向僱傭公司申請海外姐姐來港，希望可以找到一個好幫手來湊小JM（有事先言明搵識湊初生）。但僱傭公司卻一再延誤姐姐的「入屋日子」，直到小JM出世前幾天工人姐姐才到港並開始工作。而更甚既係到埗以後才發現原來姐姐係唔識及未湊過初生小B，明顯與僱傭公司提供既履歷不乎。

還好發現得早，所以坐月子既時候即使幾辛苦都好，都依然會選擇自己落手落腳湊小JM。幾乎每兩小時就要餵哺小JM，每天都未曾安睡過，但只要見到小JM安心滿足既食飽睡覺樣，就已經令媽媽感到快慰。

基於小JM爸及家人都需要返工，所以亦只好「無奈接受」，唯有安排姐姐做清潔及預備工作，當然偶爾都會教姐姐點樣湊小B。
可惜最後礙於姐姐既清潔衛生問題及缺乏照顧小B既安全意識，結果係第四個月既時候另請新姐姐。

基於「前車可鑑」既因由，就算產後復工、家中有工人姐姐幫忙，我亦未能放心將小JM交予姐姐全權照顧，所以放工後就會接手自己照顧返小JM，享受親餵及沖涼等親子時光。

但朋友一號聽完之後第一個反應係：
「點解唔叫姐姐幫手呀？叫佢餵都得架嘛？」
「點解唔叫姐姐較水俾BB沖涼呀？」
「咁有無叫姐姐幫手氹訓教呀？」
「其實你咁樣真係攞苦來辛，明明有姐姐都唔識叫佢做野。」

首先，我要先講一句：「唔好意思，我地既理念唔太相同。」在我立場而言，當媽媽係一份「責任」，所以會想落手去做好每件事。

當然，偶然要搵姐姐/爸爸幫忙係可以既，始終媽媽都係人，都會攰，亦會有病倒既時候架嘛，所以亦無需「死頂」，適當時間找幫手亦不為過。不過，老實說，如果每樣事情都假手於姐姐，而唔嘗試自己去做的話，當一個獨自帶小B個陣又會變成咩境況呢？我明白湊小朋友係會好花精神、心機及時間，但你可知道，如果萬事都依靠姐姐的話，跟小B既關係也有機會被姐姐「比下去」，
更莫說小B不喜歡黏你。其實換個角度去睇，「湊B」都可以係一種樂趣。當小B返學之後，其實同小B相處既時間就會少左，
所以趁而家好好享受一下、珍惜一下。

我明白單係媽媽一個做晒所有野會太攰，所以媽媽也可以嘗試開口同爸爸講有咩可以俾佢幫手，但媽媽也得緊記，爸爸可能係新手，千祈唔好期望太高，可以多作鼓勵，令爸爸多作嘗試及作多方面既協助。

緊隨住就有朋友二號既問題：「其實有姐姐，返到屋企應該好得閒，無咩要做先係。乜唔係架咩！？」

朋友，你太過天真了。你以為收工返屋企就了事嘛？其實只係另一份Full Time既開始。你真係想知道同了解媽媽放工返屋企要做咩嘛？好吧，我就話你知。

＊＊以下例子係以小JM媽為例子作舉例喔＊＊
7:15PM
每晚一放工入屋第一件事係： 洗手。以防帶左外面既細菌返屋企，傳染俾小JM呀嘛。洗完手之後會同小JM玩一陣，抱下錫下傾下計咁。

8:00PM
預備小JM及家人晚餐。有時會由爸爸下廚負責大家既晚餐喔。

9:00PM
準備較水幫小JM沖涼。

9:30PM
準備進行小JM既「睡前儀式」：親餵、刷牙、抹面、Bed Time Story等。仲要為小JM預備伴睡好物：跳跳虎公仔及奶咀
（大家放心，小JM入睡後就會唔要個奶咀架啦，所以唔算太依賴既。）

以上例子只係根據而家小JM的作息而例舉出來。當小JM仲係小B個陣，約半夜12點左右就需要餵夜奶，之後小JM就會一覺訓到大天光，到第二朝再夠鐘食奶個陣又會叫醒小JM。如是者，第二朝媽媽就需要07:00AM起身梳洗，準備奶泵帶返工，之後準備餵埋小JM先出門返工。而返工個陣，媽媽依然需要泵奶，幫小JM儲糧架。放工後仲要將媽媽奶「安全護送」返屋企添。

所以並唔係朋友二號所講咁得閒架咋。就算「得閒」，時間都係要「擠」出來或者訓少啲先會有架咋。所以爸爸有時間的話，不妨多抽一啲時間陪小B，等媽媽可以爭取多一啲時間休息呀。而且有研究指出由爸爸湊B既話小朋友會更聰明架！真係一舉幾得！得左！

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！