【BB加固用咩方式好？媽媽分享選擇過程〈第一回〉】

新手媽媽的煩惱，Traditonal weaning 定 Baby-led weaning ?

好多新手媽媽都會就住想行傳統餵食方式（Traditional weaning）定由嬰兒主導的斷奶方式 (baby-led weaning)而煩惱。

因為怕行傳統餵食方法，BBs會慣左俾人餵，而唔會自己食飯，甚至食飯仲要家長通街走，追住嚟餵。

而行BLW就可以訓練BBs自己食野，多咀嚼。不過要整BLW餐須花心思，加上時間漫長，BBs可能係加固頭幾個月都係學習階段，未見成效。

點解會行BLW呢？其實蝦米妹一開始加固嘅時間仲係TW嫁，不過食咗1個星期佢都唔肯擘大個口仔比我餵食。但到食水果嘅時候又會自己用手仔去拎會搶野食，並且又會好準確咁放入口仔到。咁魚魚媽媽就上網揾下BLW嘅資料，嘗試下轉行BLW啦⋯⋯點知又出奇地順利。

到咗蟹籽仔，初初嘅蟹籽仔比魚魚媽媽話佢「懶惰仔仔」。點解？因為無論放咩係佢面前，佢都唔會有動力去用手仔去拎嚟食，就連水水，玩具都一樣。魚魚媽媽當時有種失望嘅感覺。唯有就係煲下粥仔整下糊仔比蟹籽仔食。

唔知係唔係有蝦米妹嘅影響之下，蟹籽仔突然會拎野食放入口仔。（每日食飯時間，蝦米妹都係坐係蟹籽仔對面繼續行蝦米妹嘅BLW）

魚魚媽媽見到咁嘅情況，就嘗試烚下菜心莖比蟹籽仔食，佢竟然成功食到。（點為之成功？就係留意下佢嘅便便有冇菜嘅殘渣，如果有就係成功嫁啦）

之後嘅日子魚魚媽媽就嘗試整下燈籠椒、冬瓜、節瓜同紅蘿蔔等多水份嘅蔬菜，全部蒸到淋身。

慢慢魚魚媽媽再加入番薯、南瓜、栗米等等（記得切到大大舊，等佢可以拎起嚟咬。）

到咗8個幾9個月大時，就做了飯波、BB麵、烏冬等等嘅澱粉質比佢。

最後就係肉類，魚魚媽媽會將雞肉，牛肉，豬肉切一條條，方便佢揸住嚟食，每種食物都會試3天先再加第二種食材，以防敏感。

上面提到蝦米妹行BLW行得好順利，其實魚魚媽媽身邊嘅長輩一開頭都非常抗拒蝦米妹行BLW，成日都會話我整得太大舊會噎親蝦米妹（長輩們係話噎死），個個都叫我剪到細細粒比佢食。

其實BBs都有「自我防禦機制」，當放入口嘅食物太大，佢哋又咬唔到，他們會有「作嘔」（gag）嘅動作，會自己將食物吐翻出嚟，所以真係家長毋須過分擔心。

其實BBs試過一兩次之後，自然會識後控制入口嘅份量同咀嚼嘅次數。同BBs挽玩具嘅道理一樣試過幾次就知道件玩具係點挽。

長輩們除咗話會噎親之外甚至係話魚魚媽媽懶，唔肯煲粥比蝦米妹食。

其實BLW 嘅BBs會將食物搞到周圍都係，每次吃完飯，飯廳就好似戰場咁四周一片狼藉，要花大量時間做清潔，有時候真係會崩潰嫁。

記得有一次比士多啤梨2隻小魔怪食嘅時候真係以為發生血案，因為佢哋成頭成面都係士多啤梨嘅汁、成張枱櫈全都係紅色。

佢哋又成日會用掂過野食嘅手仔去「R」頭，結果每次吃完飯都要洗櫈，掃地拖地，最後又要重新同佢再沖涼。雖然係好攰，但見到佢哋食得得開心、食得好，又會覺得一切都係值得。

行BLW並唔代表媽媽懶，BBs最初用手探索食物，其實對佢哋嘅感官發展有幫助，佢哋需要用手去拎食物，捉摸唔同食物嘅質感。

再大少少BBs有選擇嘅空間，感到被尊重，對佢哋身體發展及個人成長亦有幫助，仲可以提升自信心，等佢哋勇敢表達自己。

慢慢魚魚媽媽身邊嘅長輩見到蝦米妹嘅進步，佢哋甚至用TW嘅小朋友做對比之後，就冇再反對我哋行BLW啦。

。。。。下回再續。。。。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：媽媽魚魚

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！