堪稱植物界燕窩！雪蓮子配桃膠煲糖水 養顏護子宮效果甚佳

早前全城熱捧植物界膠原王「桃膠」，就連肥媽都喺節目中介紹用桃膠整糖水，今次就跟大家介紹養生界新貴「雪蓮子」～記緊養生食材要識得「搭配」，功效先會好，例如黨參配北芪、花旗參配石斛，都可以將功效倍大加強；而桃膠嘅最佳拍檔就係「雪蓮子」！

桃膠又名「桃花淚」，係薔薇科植物桃或山桃等樹皮中分泌出來的樹脂，為一種固體的天然樹脂，天然無毒。桃膠內含有豐富的氨基酸，能促進膠原蛋白被人體吸收，喺中國的古代醫書內都有記載，桃膠可以用來治療血淋和石淋等病症，還有生津止渴，緩解壓力等功效。

而雪蓮子可以話係植物界燕窩，對補腎虛、暖子宮極有好處。雪蓮子含有豐富蛋白質、藻角質同氨基酸，可以潤膚養顏，另外含有獨特嘅雪蓮內脂同雪蓮多糖，有效防止肌膚被紫外線侵襲，預防色素沉澱。

要將桃膠、雪蓮子快速浸泡，可以用炆燒杯加入滾水，放入桃膠、雪蓮子，蓋上焗1小時，以下呢款雪蓮子桃膠糖水就適合養生至上嘅女生～

材料：

1.雪蓮子 16粒

2.桃膠  8粒

3.紅棗（貢品級） 10粒

4.龍眼乾 10粒

5.乾百合  半両

做法：

1.先將雪蓮子、桃膠用水浸泡6個鐘，洗乾淨備用。

2.紅棗洗乾淨後，開邊去核。

3.乾百合浸水10分鐘，然後沖洗。

4.凍水落桃膠、紅棗、龍眼乾、乾百合，以大火轉中火煲半個鐘。

5.最後加入雪蓮子，以中火煲多5分鐘。

Text：Mami Editorial

Photo Source：mawgarden @ ig, pigflyin @ ig, mandymandy29 @ ig, allie0054 @ ig