【加固紀錄】半歲剛加固就遇到食物敏感？又屙又嘔驚險記

越來越多媽媽選擇行BLW，不過我就選擇左TW⋯一來我怕星雨哽親會嚇餐死，二來可以知道星雨食幾多。

從食物質感開始慢慢轉變，循序漸進幫星雨加固

由口感幼滑嘅糊仔開始，因應星雨吞食嘅進度再調整，

一本衛生署「6-24個月嬰幼兒健康飲食起步篇」就可以幫到手

餐具方面我求求其買左碗仔同餵食匙，而食嘅係4個月以上就適合嘅有機嬰兒純米糊

五個月一星期

星雨五個月一星期大就食第一啖

佢係好幼細粉狀

我用座熱少少嘅母乳開

星雨見到個碗仔，眼甘甘咁望到實

張開咀仔迎接第一口米糊，第一次只係食左三匙～

為左練習吞嚥動作，一日食一餐

星雨足足食左兩星期米糊～

五個月三星期

五個月三星期大就開始試食唔同食物

第一樣係菠菜蓉，其後就南瓜、蕃薯、薯仔、節瓜、菜心、魚、青豆、豆腐、紅蘿蔔⋯⋯

水果方面，我就選擇左蘋果。跟隨一家人習慣齊齊食飯後果～

我一邊食一邊拎住紅蘋果直接刮蓉餵

到咗七個月大就嘗試咗木瓜同香蕉

有時會俾星雨啜下橙汁

每次試食物由一小匙開始，慢慢增加份量

同一款食物要食最少三日去睇下有冇食物敏感

敏感徵狀喺進食後數小時或數天會出現

牛奶、乳製品、蛋、花生、魚、甲殼類海產、果仁、小麥、豆類、燕窩係較容易引起過敏反應的食物

六個月兩星期

六個月兩星期大我就俾星雨嘗試咗蛋黃

第一日食咗兩啖唔見有問題

第二日就加咗四分一蛋黃溝米糊食，食完大約兩個鐘就嘔⋯仲嘔咗幾次

我就帶咗星雨去睇醫生，醫生話係食咗不潔食物...

之後星雨開始發燒，醫生話：「嘔清應該就唔怕，不過食物可能已經入腸，有機會痾」

睇完醫生返到屋企就開始痾...

食咗藥就停左痾嘔

隨後一星期，可能星雨嘔過、痾過覺得辛苦就唔肯食米楜，只肯飲奶

唔好講星雨怕咗，我都一樣怕咗

唔敢俾星雨食蛋，諗住等到佢一歲再試過啦～

希望星雨肯食番固體，我就轉咗煲軟綿綿粥試試，佢由食幾啖到食小半碗

七個月

七個月大嘅時候我就曾經將試過嘅食材加入粥

通常一份蔬菜一份魚，食得都算唔錯～

一日一餐，一餐有大半碗；

七個月兩星期

星雨染咗水痘唔願多食，只願飲奶

特別係發高燒既時候，完全唔肯食，只肯飲幾啖奶～

足足兩星期一日一餐，食得四分一碗

見到佢明顯消瘦咗，無左肥嘟嘟嘅身影⋯⋯

八個月

開始肯食番好少少，慢慢有半碗至大半碗

見到星雨肯食，我就幫星雨加多一餐變成一日兩餐

原先食開一餐食大半碗，新加嘅一餐我唔敢俾太多，由三分一碗開始，隨後慢慢添加到大半碗

同時開始食BB餅仔

九個月

星雨要去健康院睇發展：9.04KG，生長線由頂線97跌左一條⋯⋯

姑娘隨後知道星雨一日兩餐固，每餐大半碗至一碗，有菜有肉有水果

話跌磅只係生病食唔少咗影響，叫我唔需要緊張，可以加多一餐固

食得是福，我會繼續讓星雨愛上「食」！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：MR. MOON & RAIN 甜心小屋

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！