【用電流減痛都只開1度 媽媽分享畢生難忘生產過程】

雖然溫柔已經半歲，現在轉了全職媽媽才有些少時間紀錄一下畢生難忘的生產歷程。

溫柔的預產期是2018年9月8日

9月3日早上去洗手間，發現有少少血絲，應該係見紅了，聽朋友講見紅唔洗咁急入院，沖埋涼食個早餐先，拎埋走佬袋就搭的士入院啦，咁岩撞正開學日同返工時間，仲要落大雨，塞車。

去到產房俾姑娘檢查完話要入院，去左婦產科病房等，間唔中都有假陣痛，但之後又無，第一次生，都唔知點先係真，姑娘話每隔5分鐘痛一次先叫佢。

住左3日醫院都無咩動靜，都係keep住見紅，假陣痛，醫生話第四日都唔出黎就再打催生，仲伸手入去幫我撩鬆宮頸，嘩！感覺好恐怖，好痛！

之後出多左血，醫生話正常，唔想住咁多日醫院，我寧願快啲打催生。

到了要打催生前一晚，12點開始有規律咁陣痛，我驚又係假，開住個Apps計時，keep住3-5分鐘痛一次，每次痛45秒以上，痛左一個鐘我先敢叫姑娘，但唔知姑娘係咪又覺得我係流，定好忙，我叫左佢3次先肯黎睇我，開始越黎越痛，啲血又多左好多，好想開大感覺，去廁所又痾唔到，一路望住個鐘一路痛，只係得幾秒鐘抖一抖又陣痛，越黎越密，條腰好痛好痛！痛到好似就黎斷咁，又係咁想痾野出黎，姑娘俾電流我減輕痛楚都無用，幫我check開得一度，仲未落得產房，我痛到大叫，仲feel到有野噴出黎，唔知係咪穿羊水，又好想痾野出黎，總之就勁痛！姑娘叫我打電話俾老公，之後就推我落產房，仲要自己過床，唔痛果下就行過去，仲俾人鬧唔好係度痾！大佬！我控制唔到架喎！

落到產房都未開夠度數，成班助產士叫我唔好用力，一陣爆左仲難搞，俾笑氣我聞，但唔識聞囉，吸大啖啲想嘔，個人又high high 地，同埋真係控制唔到想痾果種感覺，之後成班助產士出晒去，得返我一個係度嗌......

有人入返黎話已經開到8度，叫我老公入黎，見到頭仔，話開始教我生啦，用盡全身畢生所有力！痾左幾下，BB終於出黎啦！有啲感動，想喊，但我太攰啦，成晚無訓，痛左差唔多7個鐘，好想休克，但未完，生到爆左，要縫針，好彩助產士手勢好好，又教我聞住笑氣，唔係好痛。

BB趴係我心口做肌膚之親，一出世就識搵食，已經啜到我乳頭損左。BB係預產期前2日出世，等媽咪唔洗捱一針打催生，痛左6個幾鐘就出黎。

以為入左院就好快生得，點知住左3日先出黎，仲要係孤身作戰，以為老公會陪住一齊痛，點知臨生得先入得黎，我半個鐘唔洗已經生左。

生仔感覺真係來回地獄又折返人間，果種痛聽人講係想像唔到，真係親身經歷過先知係咩一回事。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：温柔媽
Photos： 温柔媽 & Shutterstock