點解BB淨係扭媽媽抱？ 媽媽3個小動作會間接影響爸爸同孩子關係

喺爸爸同媽媽之間，好多BB都會親近媽媽較多，雖然會令媽媽欣慰自己對BB嘅付出冇白費，但亦會令常常分身不暇嘅媽媽忍唔住呻：「點解BB成日都要黐著自己，唔可以搵下爸爸呢？」除咗爸爸因工作關係少見BB外，原來亦有機會係因為媽媽慣常做以下3個舉動，令BB慢慢對爸爸產生疏離感。

1. 孩子面前質疑爸爸嘅能力

媽媽們都會親力親為照顧BB各種大小事，可謂熟能生巧，總係三兩下手勢就完成。但有時忙起上黎，都會要求爸爸幫忙做下育兒工作，冇咁熟手嘅爸爸可能做慢少少，或做錯少少，媽媽就會睇唔過眼，喺孩子面前嫌棄爸爸嘅「成品」、質疑爸爸嘅辦事能力。BB睇在眼內，就自然會覺得爸爸係「唔可靠」嘅人，亦會「有樣學樣」去嫌棄爸爸。自覺被孩子無視嘅爸爸自然會更無癮，寧願去打機尋求成功感，更令媽媽感到爸爸無心參與育兒事務，形成惡性循環。

2. 拒絕爸爸參與育兒工作

當爸爸喺育兒工作上做得唔好嘅時候，媽媽就會好自然搶返育兒工作黎做，如餵奶、換片、沖涼等，然而呢啲照顧工作都係同BB接觸、培養感情嘅大好機會，所以會變相令爸爸可親近BB嘅時間更少。

3.經常搶住親近BB

當BB扭計，「心軟」嘅媽媽總會第一時間衝去安撫BB； 當BB要擠到床上，同爸爸媽媽一齊瞓，爸爸總會因為床位唔夠而自動退出去梳化／書房瞓，只留下媽媽同BB瞓⋯⋯好多時，每當BB需要陪伴時，可以建立安全感嘅對象總係媽媽，爸爸就慢慢成為邊緣人一樣嘅存在。

經常呻好忙好攰嘅媽媽們，一方面想爸爸多參與育兒工作，另一方面又唔敢放手俾爸爸去做； 想爸爸同孩子多親近，但又總係將爸爸隔離開去。媽媽們係時候要反思自己有冇做過以上3個行為，如果有嘅話，就係時候要控制一下自己嘅緊張心態，試下「隻眼開，隻眼閉」，留返個機會俾爸爸同BB多啲相處。

Text：Mami Editorial

Photo Source：Shutterstock, Pinterest