【帶0-6個月大BB外出3大考慮】

香港地少人多，去到邊就逼到邊。

我明白帶BB車出街好唔方便，坐巴士同坐地鐵又好阻人，要經常「唔該」前「唔該」後，只好用揹帶同星雨出出入入⋯⋯

攰係好攰，不過想出街就一定要揹～

星雨出世頭一個月未出過街，第二個月依然係深居簡出⋯只有去下娘家同屋企樓下曬太陽

三個月大腰頸開始有力，可以直立咁揹就去得遠少少啦～坐巴士去下商場行下街街

自己一個出街，一個手袋仔袋手機電話銀包就可以起行！

帶住星雨出街要帶好多野：

一套替換衫仔同褲仔：BB需要就有得換（突發的事情太多⋯好似嘔奶、流口水、換片瀨濕等等）

外套仔：BB瞓左覺要遮一遮

尿片：預兩個鐘換一塊再加一條後備，BB屁股唔焗得太耐。因為BB好鍾意一換就即刻去，我通常帶五至六條～

BB用濕紙巾：換片、抹手仔、口仔用...

一樽水：BB間中要濕濕口仔

紗巾：餵奶、抹口水用

紙巾：好多時會需要用

防水換片墊：換片用

消毒濕紙巾：用來清潔育嬰室個墊，眼見有好多識行既小朋友着住鞋咁企上去換褲，抹一抹安心一點！

消毒潔手液：同BB換片前消毒一下雙手

小膠袋：用作棄置臭臭片片

＊育嬰室有時未必樣樣齊備，因為育嬰室經常爆滿，未有時間俾職員REFILL

奶粉BB：熱水壺載熱水、奶樽載室温水、奶粉格載奶粉

泵奶BB：保温袋載雪奶／冰奶、熱水壺載熱水座熱奶用

埋身BB：一條餵奶巾

安撫奶咀：BB喊個陣用得着

揹住星雨再揹住背囊，我明白、我知⋯⋯前一個後一個，真係好麻煩。

為避免撞到人，我行路已經一步一小心啦。不過有時坐巴士坐地鐵，人太多就避無可避、車一CHOK就唔小心撞到人⋯⋯

老實講當時真係覺得好唔好意思，只有不停咁講SORRY，幸好我遇到的全是好人，願意體諒願意包容，未有責怪我撞到佢

反而幫我揾一個安全既位置俾我企好，人間其實有情，用你既情去令人間有情啦～

我自己覺得咁細個唔好由朝去到晚，頂盡係三至四個鐘，等再大下先再耐D啦！

頭六個月同星月出街，真係要諗過度過！

通常考慮三點 ：

1.天氣

天文台話落雨就一定取消，避免淋濕生病～

2.地點

一定會放棄人煙稠密既地方，人多病菌多

一定會選擇有育嬰室既商場，育嬰室需求好高，好多時要等～不過好過俾人偷影話周圍換片啦

3.時間

夾岩餵左奶稍息一陣換埋片就即刻出門，睇下會唔會可以中途唔餵奶等番屋企餵

隨住星雨一日一日咁大，一出街就周圍擰周圍望、八八卦

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：MR. MOON & RAIN 甜心小屋

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！