【包媽孕記｜親力親為籌備寶寶的首個派對 - Baby Shower】

第一次見到棒棒2條線永世難忘，其實知道BB性別嘅一刻都記憶猶新！

由於包媽有去做Nifty Pro，12周就已經知道包包性別啦，透過電話由診所姑娘告知驚喜欠奉，當晚就準備小驚喜話俾老公知，仲拍埋片影低佢第一個反應＆有咩說話同包包講（哈哈）

至於朋友們我地就一直守口如瓶，大家不停套口風點都唔講，因為我地一早諗住幫包包舉行人生首個party - Baby Shower，同大家分享喜悅。

由於包媽孕吐真係極度嚴重，去到18周都仲會日嘔15次⋯⋯Baby Shower日子亦一改再改，最終選擇孕期去到一半即20周前一日舉行，地點就喺包包屋企，9個大人3個小朋友以一個小型聚會形式舉行。

睇報導明星搞嘅Baby Shower都美輪美奐，Deco 媲美小型婚宴一樣，我地就行簡單溫馨路線，多謝小K媽媽幸福傳承影相道具和Boy or Girl拉繩，Party前一日由包爸負責佈置～

包媽電腦自行拚貼嘅Party Poster，喺淘寶買幾個It's a Boy/ Girl嘅粉紅粉藍汽球，加埋一條「Mom to be」肩帶就夠啦簡簡單單影出嚟效果都唔錯呀！

食物方面：由於party時間係夜晚，都預埋大家食dinner要飽肚少少，影相好靚嘅cupcake、cakepop就唔買啦，加上有幾個已加固嘅小朋友，喺印尼餐廳外賣買咗D糕點、海南雞、黃薑飯、印尼炒飯、豉油雞翼，再自己整少量食物，男士們都話夠晒飽、捧住個肚走呀～

最緊要當然唔少得一個靚靚Gender Cake性別蛋糕啦﹗本身包媽真係有諗過自己動手整，但體力上真係負荷唔到，唯有上網物色啦。有晒造型嘅糖皮蛋糕靚就靚，但有小朋友好似太甜唔多適合，Butter Cream/擠花普遍價位比較高過千蚊，人少少又好似貴咗啲。

好在最終喺IG搵到呢間Cake Shop，可以就人數口味talior made，顏色任我揀，幫我諗埋點樣加BB元素，知道多小朋友仲問使唔使少甜，最緊要係：舖頭喺觀塘居然肯免費喺荃灣線交收，正呀﹗(舖頭名已在雲妮手札公開)

交收時一見到個蛋糕，包爸包媽都嗌咗出嚟：「好靚呀﹗」

切蛋糕環節，朋友仔連環幫我地不停影哈哈﹗
仲要好睇又好食，勁多生果唔會太甜，色素唔太多，大人小朋友都食得好開心~

睇到蛋糕內部顏色就知道，包包is a Boy～大個可以跟爸爸去踢波波啦！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos： 包媽雲妮

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！