女兒都係媽媽嘅小情人 女兒令媽媽感幸福3件事

生女兒除咗係爸爸嘅小小情人外，其實亦係媽媽嘅貼心好姊妹，除咗因為大家都係女性，容易理解同溝通外，以下3件事更會令媽媽感到生女兒真好！

1. 可以盡情買衫扮靚

呢個世界有一個極唔公平嘅現象： 女生嘅衣服款式遠比男生多。所以生個可愛嘅女兒，媽媽就可以盡情滿足為女兒扮靚靚嘅欲望，由紮咩頭髮、戴咩頭飾、著咩上衫襯咩下裝、抑或著咩連身裙、配搭咩襪同鞋都足以令媽媽每日花好多時間去構思同準備，一副時裝設計師上身嘅樣，每當裝扮好女兒後聽到老公同途人都忍唔住讚：「好靚呀！」媽媽內心都會非常自豪！有時仲會將自己同女兒一齊搭配出母女裝，樂趣無窮！

2. 自己心愛嘅卡通人物有繼承者

好多時媽媽鍾意嘅卡通人物都係可愛嘅Hello Kitty、My Melody等女孩至愛，生女兒嘅話，就可以將自己嘅喜好都同女兒「分享」，大條道理去買呢啲精品玩具畀女兒，令自己都賞心悅目，非常有滿足感！

3. 乖巧貼心覺得媽媽最靚

女兒通常都較乖巧貼心，愛向媽媽撒嬌，識得賣口乖讚媽媽靚靚，令媽媽心花怒放！簡直係媽媽嘅小天使！

Text：Mami Editorial

Photo Source： Pinterest