點解BB只會「蝦」媽媽？ 原來係表達愛意 BB專恰媽媽嘅3個表現

隨著BB愈黎愈大，小小腦袋都愈黎愈多鬼主意，媽媽們亦會開始察覺到，從前嗰個乖巧嘅小寶寶有時會有啲小調皮嘅行為，仲好似專揀媽媽黎「蝦」，如喺媽媽最忙嘅時候要討抱抱，趁媽媽專心睇電視時喺媽媽背後拍打⋯⋯令媽媽好氣又好笑，原來呢啲都係BB對媽媽愛嘅表現，以下呢3個BB示愛方式，媽媽們點能夠抗拒呢？

1. 指定要媽媽抱抱

即使BB會走路、出街會甩開媽媽走得遠遠，但好多時候，都只會指定要媽媽抱抱，無論媽媽係食緊飯、去緊廁所定係忙緊做家務，小小傢伙都會纏住媽媽直到得逞為止，有時媽媽內心都會感到小無奈： 點解偏偏係我啊？搵爸爸好唔好？ 但睇見BB充滿渴求嘅眼神，心軟嘅媽媽都係會抱起BB。其實BB之所以要指定媽媽抱，其實係BB單純想回到媽媽嘅懷抱裡，同時亦可能係當下BB感到冇安全感，所以急要媽媽抱抱，因為喺BB意識中，媽媽先係同自己最親近嘅人，能夠俾到自己足夠安全感，所以即使BB平時幾鍾意自己走路都好，都會想媽媽去抱抱自己。

2. 小手塞媽媽嘴

媽媽們有冇試過，當想氹BB瞓覺時，BB毫無睡意咁認真盯著媽媽，然後用小手亂戳媽媽嘅眼鼻口，仲會趁機將自己嘅小手塞入媽媽口內，呢啲行為都會令媽媽們感到納悶，點解BB要咁樣糟質媽媽呢？ 其實媽媽們不妨回想下，BB平時係咪都會將小手塞入自己嘅嘴裡吸吮？喺BB嘅角度，咬自己嘅小手係一件充滿趣味嘅事，所以都會想同媽媽一齊分享，令媽媽都感到開心！雖然有時BB唔係好精確控制到自己小手，變成亂抓媽媽嘅臉，但其實都係BB表達緊愛意，媽媽們就原諒BB吧！

3. 抓住媽媽頭髮

咁係因為頭髮充滿著熟悉嘅媽媽氣味，BB之所以會揪媽媽頭髮，都係因為想媽媽留喺自己身邊，跋著呢股令人安心又親切嘅氣味。其實唔止頭髮，有時候BB都會扯住媽媽嘅衫、抱住媽媽嘅腳，就係想黐實媽媽，呢啲都係BB愛媽媽嘅表現啊！

所以媽媽們，唔好誤會BB嘅舉動係想欺負你哋啊！其實BB係好愛你哋至真！

Text：Mami Editorial

Photo Source： Pinterest