【堅持全餵母乳唔容易 媽媽分享心路歷程&小Tips】

近年比較鼓吹餵哺母乳，而且世衛亦建議BB出生後至6個月全餵母乳，可以為BB同媽咪既健康帶來好多既好處！

經過SiuBma既research，可以比少少資料比新手媽媽了解一下，咁就更加知道自己既方向啦！

但當然亦有附帶嘅問題, 不少新手媽媽會遇到冇奶 or 要追奶嘅問題！而且生完BB後亦會因情緒壓力和睡眠不足等等嘅問題困擾, 真係媽媽唔易做!

SiuBma同各位都一樣, 比各方嘅資訊令我認為餵哺母乳係最好嘅選擇~ 當SiuB出世嘅時候, 頭1-4日係完全未上奶, 起醫院時SiuB係比較瞓得多, 所以keep住埋身親餵問題不大! 但係去到第2日開始SiuB不停喊, 埋身為足幾個鐘一鬆口就喊不停, 而我就不停咁check片片有冇濕咗, 係咪熱或者凍？但係發現樣樣都唔係 -- 即係肚餓。姑娘見到就話因為未上奶, 所以要補奶粉, 為免BB脫水! 當時我聽到真係晴天霹靂⋯⋯心入面有10萬個唔想, 怕BB飲完奶粉後會唔再飲母乳, 因為怕奶粉太甜. 但係迫於無奈亦都要接受, 我相信未上奶, 冇奶或者唔夠奶係大眾媽媽最大嘅困擾!

其實幾時上奶係睇體質, 所以各位媽媽唔好有太大嘅壓力, 勤力啲比BB埋身! 再加上飲多啲水, 同要有足夠嘅休息! 咁好自然就好快上到奶, 保持心情輕鬆真係好重要! 但要注意~ 啱啱生完BB嘅頭幾日唔好咁心急飲上奶湯水, 因為乳腺未通, 再飲就會谷奶...會非常容易塞乳腺㗎!

SiuBma起第5日已經開始上奶, 但係SiuB竟然唔鍾意埋身!!! 因為SiuB出世時有黃疸....所以亦留院左幾日, 而當時我就要出院先, 返屋企嘅時候SiuB已經唔鍾意埋身, 不停咁扭計, 又喊住咁啜...所以我最後係要做全泵媽媽!

當時我聽過有好多媽媽話全泵會越泵越少奶量...但係我發現呢個唔係完全正確! 因為SiuBma親身證明泵媽都可以增加同keep到奶量! 好啦~ 等我分享一下我嘅泵奶schedule la!

- 每3小時泵一次每次最少20分鐘至30分鐘

- 先用Massage Mode 5分鐘至10分鐘再轉 Expression Mode

- Expression Mode 時用手按摩乳房，由外向乳頭方向一下一下推

**如果想知道SiuBma用咩泵機可以PM或者Inbox問下我!

就係用呢個方式SiuBma快就變成富媽媽啦!!!

當然呢個只供參考, 都要因應個人體質! 以上嘅資料係SiuBma 起健康院請教左好多母乳姑娘, 再不停嘗試各種嘅方法, 而搵出最岩自己既方式。

希望呢篇文可以幫到各位嘅新手媽媽啦!!

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：SiuBma

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！