【驚去旅行唔啱小朋友玩？可以帶佢地去打工 順便爭取Me-time】
新年長假期來一個突如其來的新春＋情人節之旅～對於第二次帶二寶同屋企人去旅行，最終都係去番最Kids-friendly既日本。
雖然二月份天氣仲好凍，不過日本既安心及親子指數達5星，所以最後都係選擇大阪。
反正二寶都未去過關西，今次就為大家重點推介三大關西親子遊必去之選！
EP1. 包包去哪兒 の 大大大阪
親子遊推介第一位: 甲子園KidZania
KidZania 係一個兒童職場體驗館，於日本多個地方及全球均有分店，埸內有超過過百間由日本大企業合作的職場體驗工作坊。超生活化，而且仲會有糧出（趣志幣）多勞多得 ！
對於包包黎講，Daddy媽咪返工就等於唔陪佢。所以佢細個嘅時候，每逢媽咪返工，佢都會喊住話唔好⋯⋯咁我當然要氹佢話媽咪返工先有錢買玩具，佢竟然話唔要玩具！(因為唔想我返工)
可能各位媽媽都有所經歷，聽到真係心都酸⋯⋯到而家三歲半，對返工一回事半知半解。
同時對唔同職業開始感興趣，所以一於帶佢去體驗下日本當地既職場文化！
如何購買門票? (WALK IN/ONLINE)
建議大家先於網上購票，以免影響行程。
而且週末比較Full，好多日本家長都會帶小朋友去玩，所以可選擇閒日前往。付款後只要列印電子入場卷，入場時出示就可以。
KidZania主要分為兩個時段：早上9:00-15:00 及下午16:00-21:00
第一節為6小時，第二節為5小時 (所以第二節收費較便宜)
*第二節時段可於15:30入場準備，需於入場前放下BB車及收拾隨身物品
以下為第一時段(9:00-15:00)之收費參考 3歲以上(約HKD$375)連稅 成人(約HKD$150)連稅
*如生日月前往，可告知工作人員，佢地會為小朋友送上生日卡及可免費體驗需支付趣志幣的活動
KidZania位於甲子園站，可參考以下前往方法：
於甲子園站，出閘後一直路步行五分鐘便可到達LaLaport商場。
*但行去KidZania就需時約15分鐘
到達LaLaport商場後就會見到一架彩色小火車於廣場外，細佬B訓醒見到就嘩嘩聲大叫⋯⋯
中午時間當然要先醫肚啦！我哋揀咗一間半自助日式餐廳，自己揀選午餐set，另附送日式料理及明太子放題。
食飽就出發，可按商場指示行到KidZania counter，出示電子入場卷後，職員就會分發旅行支票、工作行程證、城市地圖及入場卡。
包包小朋友因為瞓晏覺，所以遲咗入場，心急到大喊
(*係架！番工係唔可以訓到自然醒，好可憐架！) 所以好好享受讀書時光！！
大阪甲子園KidZania分為兩層，上層有較熱門的病院、消防局、Pizza食物工場、ANA航空公司。
下層較熱門的有Shiseido、警局、駕駛車場、銀行、高島屋。
埸內有超過過百間由日本企業合作的兒童工作坊，出發前可先同小朋友商議想體驗的工作。
場內攻略 - 入場後，先前往心儀體驗嘅活動，向指導員出示工作行程卡就可以報名參加工作體驗。
方法分為兩種，如熱門活動需預約報名，就不用排隊，衹需指定時間返回準備。
另如果活動人數上限未滿，便可即時排隊參與。
ROUND 1
包包近排對化妝好有興趣，所以一去到，就先去熱門Shiseido化妝體驗活動預約。
右圖係一塊好重要嘅資訊版，顯示工作坊嘅開始時間。
下方為參加人數、活動時間、建議年齡及打工後可獲得的趣志幣
100% Shiseido專門店化妝counter，小朋友攞正牌可以扮大人。
體驗坊仲有化妝服務或塗指甲油俾小朋友選擇，啱晒成日偷用媽咪化妝品既小朋友！
而且仲專業到有啱size嘅制服及名牌提供～（Professional！）
課程一開始會先為小朋友拍照留念 (*等媽媽們敗家買番小朋友打工相留念)
然後教導禮儀 手勢及笑容的重要性，雖然過程係全日文，但係小朋友嘅領悟能力高。
加上姐姐們既耐性及身體語言，絕對無需擔心！
各位小朋友會先由皮膚測試開始(兩位小朋友為一組)，真係有部機俾佢地玩架！
跟住就教小朋友化妝前需塗上護膚品及教佢地拎化妝綿既正確手勢。
最後再教小朋友用粉撲上胭脂及揸唇膏，40分鐘初體驗就可以完成包包嘅真化妝願望。
化完妝出黎笑死我，好可愛～媽咪都係鐘意妳素顏多d ！
ROUND 2
第二個體驗坊：包包就揀咗做牙醫
都係會提供牙醫袍、假人、口罩畀佢哋做實習，仲要洗手，非常認真！
今次細佬b都有同行，因為唔夠歲數關係。所以冇得玩，但可以免費入園。
埸內有好多貼心育嬰設備大可以放心俾嬰兒消磨時間。
而且育嬰室非常寬敞舒適，應有盡有。
至於家長們，休息室內有雜誌提供及自費Cafe。
家長們可慢慢享受Me time 大齡小朋友更可安心自行在場內打工實習。
ROUND 3
ANA飛行機體驗：分為機師訓練及空中服務員
由於時間關係，機師訓練可即WALK IN，所以就排了。
日本真係一個非常講究衛生既國家，每一個小朋友配戴機師帽前
都會有一個頭套派俾小朋友，確保個人衛生，讚！
機師訓練有模擬儀器俾小機師體驗，學習飛行時要注意既出發地、航班時間及天氣。
其實空中服務員較受歡迎，因為家長可以入埋機艙做乘客。
*另外魔術攝影棚／劇場／法院 ，電視台 家長都可以進場觀摩。
HOT PICKS推介
原先想玩埋消防員，可惜6:30已full⋯⋯
我地又趕住親戚黎車我地去食飯，所以唯有留番下次。
呢個體驗都相當受歡迎，有得坐消防車出勤及救火～
冇得玩唔開心，唯有影相留念啦～等下次同細佬b一齊玩啦！
病院的初生育嬰部都好受歡迎架，各位小護士似模似樣～
日本出名既快遞服務又點少得宅急便呢！
日本手握壽司Workshop極受歡迎，小學徒仲可以外賣帶走製成品，真係食得架！唔怪得預約滿到ALL DAY FULL啦！！
出糧lu～每份工都可以出到8蚊(趣志幣)。
旅行支票50蚊(趣志幣) + 3次打工所賺的24蚊(趣志幣) = 是日工資為74蚊(趣志幣)
我俾包包自己選擇想用d錢黎買野定存入銀行，佢第一時間話買野 *（小女孩天生購物狂 明既！）跟住就走入左高島屋shopping。
由於家長唔可以入去，咁就唯有等佢自己話事啦，我就係門外等。
突然有個姐姐同佢行出黎，原來佢想買彈彈波同星星夾又唔夠錢，只可以二選其一 (現實世界就係咁，等小朋友學取捨)
最後就用左60蚊(趣志幣)買左個星星夾。
餘下既錢就入番銀行，需自行排隊開户及簽名。
姐姐俾佢既存款收據
仲有銀包仔同銀行卡送，好真實哦！
敗家小分享～
其實每一個Workshop都有職員用單反為小朋友拍照留念，家長們見到自己小寶貝既職埸look真係好難唔敗家！
*大張 (約A4 SIZE)1700YEN 細張 (約B5 SIZE) 1200YEN
呢張係由媽咪從旁指導下拍攝，冇理由唔買啦！
期待下次到細佬b 3歲一齊黎KidZania打工！
甲子園KidZania
地址: Japan, 〒663-8178 Hyōgo Prefecture, Nishinomiya, Koshien Hachibancho, 1−１００ ららぽーと甲子園
電話: +81 570-064-343
包包去哪兒 ?!
東京親子遊 2018
福岡親子遊 2018
想了解更多日本住宿/日本包車服務及親子遊行程交流--> 包包陪細佬b看世界 FACEBOOK專頁
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Text & Photos： 米高媽媽
【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
