【7個月BB 7個小變化 每個變化都引起媽媽注意】

西瓜妹6-7個月的小變化，你哋又有冇試過？

**不停爬不停郁！

繼4-6個月不停翻之後,就進化成不停爬~爬到已經訓唔定 一係要坐一係要企一係要爬，普通尿片已經好難用到，要轉用拉拉褲！

**猛長期又黎啦？！
自從出完疹餓左好多日之後 佢一好番就不停飲不停食！本身餵粥仔都係玩下食下 唔係成日呑落肚,但呢次係追住食 食得好快,而且對粥仔好有要求 一定要好杰身 唔要太水！佢追食既程度係 食完粥20分鐘都無 要飲奶！食到我驚
*識呑之後 佢無乜點流口水告別左口水期

**自動發熱
以前一直屬於手腳冰冷,伴隨住猛長期 佢著薄衫開埋冷氣風扇都出汗 婆婆係側面凍到蓋被 但佢係出緊汗架 ！

**係咁大叫
好似雀仔咁 尖叫~~~~~~~尤其係你餵粥慢左少少 佢就會嗌 提你快少少！

**識得借力
話說我有一日訓係地下睇電視 佢係隔離爬,突然扶住梳化企係到嚇死我 仲要望住我笑......(所以識爬開始 真係要無時無刻係身邊）

**咩都擺落口
奶咀,玩具,衫,口水巾......連地下垃圾(頭髮,塵)都執到。。。。。媽媽心好累

**電視迷上身
有時會係電視播兒歌,一擋住佢 個樣好明顯嬲嬲豬 ！佢真係好中意坐係到棟高隻腳 haha

眨下眼又7個月 好慶幸佢一直咁乖,而我同婆婆都做到我地既目標 唔好剩係痴我同婆婆 其他人都唔痴唔抱得。依家7個月既西瓜妹 會認得媽咪婆婆,但又會個個都痴 唔怕扭計唔跟人。咁樣其實對婆婆黎講係舒服d,需要休息時 隨時過到手比其他家人幫手照顧！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：茯柃媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！